Сергмҗтә нәр болв

Б.Б.Городовиковин нертә Хальмг ик сурһульд оютнрин Өдрт нерәдҗ олн зүсн керг-үүлдвр бүрдәгдв. Хальмг кел шинҗллһнә болн дорд үзгин ик сурһулин шинрүлгдсн бәәрнд оютнрин төлә ончта нәр болв. Ке-сәәхн хувцан өмссн оютнр билг-эрдмән үзүләд, сергмҗтәһәр амрв.
Хальмг ик сурһулин һардач Салан Бадм нәәриг нүр үгәр секәд, оютнриг сән Өдрин байрла йөрәв. Бадм Катиновичин келсәр, оютна җилмүд хамгин соньн, өвәрц болна, тегәд сурһуль сурчасн цагиг сергмҗтәһәр, тустаһар давулҗ, билг-эрдмән һарһҗ, күцәмҗтәһәр үүлдх кергтә болна.
Әрәсән сурһуль-эрдмин профсоюзин Хальмг Таңһчд үүлддг әңгин ахлач Эдән Цаһан оютнриг бас йөрәһәд, ик сурһулин бәәдл-җирһлд шунмһаһар орлцдг баһчудт Ханлтын бичгүд болн мөрәс бәрүлҗ өгв.
Нәәрин йовудт баһчуд билг-эрдмән үзүлҗ, олн зүсн нааддт орлцад, соньн даалһврмуд күцәв. Байрин керг-үүлдврин чилгчәр баһчуд нәәрин хамгин ке-сәәхн оютнриг шүүҗ авв. Олна шиидврәр Антудинә Никита болн Валерия Васкеева диилвр бәрв.
Мана зәңгч