Хальмг зурач Southside Grooven

Шидр Москвад Sistema Gallery гидг галерейд секгдсн һәәхүл энд тәвгдсн зургуд нәрн болн соньн олн төрәр зургдснь олн хәләһәчнрин оньг авлв. Сойлын халхин залһлдана келн-улсин хоорндк хәрлцәнә ашт үүдсн тоот зурачин зургудт һол орман олсмн. Амр биш эн цагт олн келн-улс хамдан бәәдг ик нутгт учрдг тоот зурачин оньгт тусснь соньмслт үүдәнә. Цуг эн төрмүд мадниг чигн үүмүлҗәнә.
Соньн эн һәәхүлд үзүлсн зургудыг баһ наста хальмг зурач 2024 болн 2025 җилмүдт зурсмн. Эн үүдәврмүд һурвн әңгд хувалгдв. Һәәхүл секгдсн өдр Sistema Gallery галерейд олн-әмтн цуглрв.
Шинҗләчнр, зурачнр, оютнр болн өдгә цага билг-эрдмиг үнлдг нань чигн әмтн нааран ирсмн. Эн зурачин үүдәврмүдлә әмтн урднь таньлдсн бәәҗ.
Southside Grooven нертә зургудан үзүлҗәдг зурач олна дунд темдгтә. Хальмг Таңһчин элчллтин көдләчнр эврәннь һардач Гернзл Мучкиновала хамдан ирҗ, зурачиг дөңнв.
Хальмг зурачин һәәхүл моһа сарин нәәмн күртл көдлхмн.
ҖИРҺЛИН Кермн