Ленинградын бүслврин өдмг…

Урҗ өдр мана орн-нутгт, тер дотр Хальмг Таңһчд Төрскән харсгч Алдр дәәнә цагт Ленинград балһсиг бүслврәс сулдхсн өдрт нерәдсн санлын керг-үүлдврмүд болв. Эн санлын өдрлә ирлцҗ, Әрәсән 89 регионд «Медрл.Баатрмуд» нертә гегән-герлин керг-үүлдвр давулгдв.

Эн долан хонгин өдрмүдт «Медрл» ниицәнә элчнр сурһуль-эрдмин бүрдәцст көвүд-күүкдлә харһҗ, Ленинград балһсиг бүслврәс сулдхсн улсин туурмҗта йовдлмудын тускар келҗ өгчәнә. Хамгин түрүн харһлтс Зая-Пандитан нертә Хальмг этносойлын гимназьд, Б.Б.Городовиковин нертә Городовиковск балһсна олн салврта гимназьд, С.Радонежскийин нертә Орс келн-улсин гимназьд давулгдв. Ут тоодан 12 бүрдәцд ирлцңгү харһлтс болхмн.
Харһлтсин йовудт тер дошгн 900 шаху өдрт ик-бичкн уга кедү зовлң үзснә тускар келгдв. Ленинград балһсн бүслврт бәәсн йовдл делкән тууҗд зөвтә орман эзлсн болдг. Тер мет Ладожск нур дамҗад татгдсн «Җирһлин хаалһин» тууҗд онц оньг тусхагдв. Терүнәс нань бүслврт бәәсн арвн негтә күүкн Таня Савичева девтртән өдр болһн учрсн йовдлмудын тускар бичдг бәәҗ. Энүнә тускар эндрк арвтнр бас тодрхаһар медҗ авв.
– Дорас өсч йовдг баһчуд төрскн орн-нутгиннь тууҗиг болн энүнә чинр эрк биш медх зөвтә. Ленинградын бүслврин залу-зөргин 872 өдр мана орн-нутгин тууҗд мөңкинд үлдхмн, – гиҗ «Медрл» ниицәнә Хальмгин әңгин һардач Манҗин Элеонора темдглв.
Тер өдр Элст балһснд Ленинградыг бүслврәс сулдхсн өдрт нерәдсн «Блокадный хлеб» нертә керг-үүлдвр болв. «Октябрь» кинотеатрин өөр волонтермуд уульнцар йовсн әмтнд 125 грамм хар өдмг түгәҗ өгв. Элст балһсна Хургин депутатнр болн Әрәсән келн-улсин бүрдәцин хальмг әңгин элчнр терүнд орлцв.
– Тер харалта тууҗин халхсиг бидн мартх зөв угавидн. Тиим әәмшгтә йовдл дәкҗ бичә үзгдтхә, – гиҗ ЭГС-ин ахлачин дарук Бембин Евгений келв.
ОЛЬДАН Цаһан