Деер цаһан, дор цаһан…

Эн үвлин бар-туула сармуд ик цасн орад олн-әмтиг байрлулҗана. Бар сарин чилгчәр ик цасн орад, һазр цасар бүркгдәд, Шин җилин байран бидн йосн үвлинәр тосвидн. Элст балһсна һардврин зәңглсәр, коммунальн цергллтс эртәснь белдсн билә. Шишлң техник үвлин кемд белдгдәд, урдаснь ясгдв. Хаалһст хайдг элсн болн давсн бас белдгдв.
Элстин «Урһа модна эдл-аху» бүрдәцин 110 көдләч өдр-сө уга көдлҗәнә. Балһсна хаалһст элс хайдг 10 КДМ, КО-806, МД-43253, КО-713, ГС-1402 тамһта, цас зөөдг SDLG 953-F, экскаватор JCB 3CX, Беларус-320, Беларус-82 болн УДМ МТЗ тамһта шишлң техник олзлгдҗана.
Хамгин түрүнд Элстд көлгн йовдг хаалһст болн социальн чинртә бүрдәцсин эргндк һазрт цасн хурагдҗана. Хөөннь болхла балһсна талдан уульнцс цаснас цеврлгдв.
Тер мет «Урһа модна эдл-аху» бүрдәцин көдләчнр һартан күрз авад, өрүн эртәс авн Элстин уульнцст болн микрорайодт әмтн йовдг хаалһсиг цеврлв. Тедн дунд Лиҗин Валерий, Алексән Владимир, Алексән Людмила, Басана Санл, Балакан Николай, Григорьев Борис, Аленикова Елена, Васильев Никита, Духовский Николай мөн. Эдн цугтан элстихнә төлә сән таал тогтаһад, әмтн көдлмштән цаг-болзгтан күрхин төлә хаалһсиг цеврлсн болдг. «Үвлин теңгрт иткл уга» гиҗ келдг. Зуг иим улс мадна өөр бәәһәд тусан күргхлә, әәх юмн уга гиҗ сангдна.
Цасн орад, һаза невчкн киитрәд нег үлү бичкдүд ик байрта бәәнә. Цасар долда кеҗ наадад, өөдм һазрас цанар дошҗ йовхнь үзгднә. Иим өдрмүдт эдниг нам гертнь орулҗ болхш, гиҗ эк-эцкнрнь келдгнь мел үнн. Зуг яһдг-кегдг болв чигн цасн орснь сән йовдл гиҗ сангдна. Хагсу һазр чиг авад, намрин тәрәнә бәәдл чигн ясрх гиҗ селәнә эдл-ахун көдләчнр байрлҗ, элвг урһц авхар зуралҗана.
КАРСАНА Евгения