Цергчнриг дөңнҗәх төләднь

Хальмг Таңһчин Улсин Хуралын (Парламентин) Ахлач Артем Михайлов цергә шишлң керг-үүлдврт орлцҗадг нег һазра улсиг дөңнҗ буйнч седклин керг күцәдг улсиг ачлв. Тедн дунд Төрскән харсачнрин өрк-бүлмүдин хүүвин региона штабин ахлач Кокан Виталия болн «За наших 08» гидг буйнч седклин саңгин ахлач Елена Барсукова заагдв. Эднд цергә әңгүдин ханлтын бичгүд бәрүлҗ өгв.
Артем Михайлов нег һазра цергчнриг дөңнлһнә көдлмшинь өөдәнәр үнлҗ, эдн буйнч седклтә кесг улсиг ардан дахулҗ, Төрскән харсачнрт болн теднә өрк-бүлмүдт ик чидл-омг өгнә гиҗ темдглв. Харһлтын йовудт олна ниицәсин ахлачнр күцәҗәдг көдлмшиннь тускар ахрар келҗ өгәд, таңһчин цуг улс буйнч седклән медүлҗ олна кергт орлцдгиг темдгләд ханлтан өргв.
Давсн җилин чилгчәр болсн сүл сессьт цергә керг-үүлдврт орлцач Одган Арслң Әрәсән харслтын Министерствин Өмн үзгин цергә багин командир генерал-майор Денис Барилон даалһврар Хальмг Таңһчин Улсин Хуралын Ахлач Артем Михайловд, энүнә дарук Бадмин Вячеславд болн депутат Пүрбән Олегд «СВО-д дөң күргсн төлә» гидг медаль бәрүлҗ өгсн билә. Артем Михайловин келсәр, зака үүдәгч бүрдәцин депутатнр цергә шишлң керг-үүлдврт орлцачнрт дөңгән күргҗ, өрк-бүлмүдт килмҗән тусхана. Гертнь үлдсн өрк-бүлмүдиг һол оньг тусхаҗахиг мана баатрмуд медх зөвтә. Эн кергт бидн цуһар арһ-чидлән негдүлҗ хамцу үүлднәвидн, гиҗ Артем Васильевич келв.
БАТАН Наталья