Эмчнр Овата селәнд одв

Сегодня, 13:24 | Общество, Таңһчин зәңгс, Зіњг, Эрўл-менд харлһн

Хальмг Таңһчин Толһач Хаска Батун седвәрәр бүрдәгдсн «Эрүл-менд бәәтн!» гидг керг-үүлдврин дөрвдгч девсң төгсв. Эн сарин эклцәс авн эмчнр таңһчин хол селәдт одад, бәәрн әмтнә эрүл-мендин бәәдл шинҗлв. Шидр эмчнр Целинн района Овата селәнд одв.

«Эрүл-менд харлһн» гидг келн-улсин төсвин йовудт селәнд тосхгдсн эмнлһнд әмтн олар цуглрҗ, олн эмчнр ирхинь медәд, эднә сүв-селвг авхар шунв. Селәнә эмнлһнә фельдшер Юлия Антонован келсәр, селәнә әмтн җил болһн флюорографин болн маммографин шинҗллт кенә, диспансеризацд орна. Удл уга селәнд бруцеллез гемәс саглуллһна тәрлһн кегдх болв. Троицкое селәнд Элст балһсна поликлиникин 5-ч тойгта әңг үүлднә, тегәд тендәс ирсн эмчнр Лиҗин Лариса, Учан Байр, Бадмин Анҗа, Түтән Лариса селәнә әмтнә эрүл-мендин бәәдл шинҗлҗ, күн болһнд килмҗән тусхаҗ эмнлһнә халхар селвгән өгв. Келхд, эн керг-үүлдврин йовудт зүркнә эмч Бадмин Анҗа бәәрн залуд бачм дөң кергтә болҗахиг илдкәд, терүг П.Жемчуевин нертә таңһчин эмнлһнд дарунь йовулх шиидвр авв.
Шишлң медицинск дөң күрглһнә «Сулда» төвин эрүл-мендин әңгин мергҗлтнр селәнә әмтнлә олн зүсн гем гетллһнә төрәр күүндв. Эмч Бембин Валентина ямаран хот-хол цогц-махмуд батрулхин туст селвг өгв. Медицинск эгч Пүрвән Юлия кардиовизор кергсл олзлҗ, зүркнә булчңгин бәәдл шинҗлв, мергҗлт Мунчинә Бадм эднә хәләврт орсн улсин то диглв. Келхәс, медәтнр дунд ямр нег гем эртәр илдкҗ эмчнрин эмнлһ авдг улс баһ биш бәәхнь медгдв. Тиигәд, далн дөрвтә Чавлинә Светланан келсәр, эн өдр болһн цогц-махмудан батрулна. Медәт өдр болһн олн зүсн темс, зер-земш хотдан орулна. Авальнь сүл һурвн җилин эргцд күндәр гемтә, тегәд Светлана Савельевна энүг арднь орҗ хәләҗәнә. Зүркнә эмчд бийән үзүлхәр ирсн болв.
- Эн сарин эклцәс авн эмчнрин баг таңһчин райодын хол селәдт одад, әмтнд дөңгән күргв. Бидн ут тоодан 18 селәнд күрвидн. Эндр таңһчин Толһачин седвәрәр бүрдәгдсн керг-үүлдврин дарани девсң төгсчәнә, терүнә йовудт кедү күн эмчд бийән үзүлснә, кедү күн гемтә болсна, кедү күүнд немр шинҗллт керглгдснә аш диглгдхмн. Селәнәхн эмчнр ирхиг теңкән уга күләнә. Эн керг-үүлдвр давуллһн сән авъяст тохрв гиҗ келҗ болҗана. Бидн эн керг-үүлдвриг җилд хойр дәкҗ давулнавидн, тегәд дарани девсң ноха-һаха сармудт болхмн гиҗ зуралгдҗана. Эн керг-үүлдврин йовудт эмчнр медәтнрт, гемтә-шалтгта улст, цергә шишлң керг-үүлдврт орлцачнрт болн теднә өрк-бүлмүдин гешүдт онц оньг тусхав. Әмтн таңһчин Толһачд, таңһчин эрүл-менд харлһна министерствд, эмчнрт ик ханлтан өргҗ, селән һазрт бәәдг улст сән чинртә эмнлһ күцәх күслтәһәр эн керг-үүлдвр бүрдәгдсиг өөдәнәр үнлҗәнә, - гиҗ таңһчин эрүл-менд харлһна министрин селвгч Батыра Зинаида келв.

ДООҖАН Наталья

Видео