Бамб цецгин наадмин байрт ирҗ орлцтн!

Сегодня, 13:25 | Общество, Таңһчин зәңгс, Зіњг, Сойл

Хаврин кем хальмг теегт хамгин сәәхн цаг болдг. Мел эн цагт өргн тег улан, цаһан, шар бамб цецгүдәр бүркгднә. Үвлин хөөн күн болһн серсн болад, тег әмләд, чидл урһсн болҗ медгднә. Ах үйин улс болхла үвләс әмд-менд һарч, дарани хавран тосад байрлна. Нег һазра мана бичәчнр, шүлгчнр болн зурачнр хаврин ке-сәәхн теегән магтҗ, кедү үүдәврмүдән нерәдсн болх гиҗ сангдна.
Эндр мана таңһчд хаврин хамгин сәәхн байр – Бамб цецгин наадм эклҗәнә. Хальмг Таңһчин Толһач Хаска Батун зәрлгәр эн керг-үүлдвр 2022-ч җиләс авн сара хонгин туршт давулгддг болв. Эн җилин нәр-наадн орн-нутгин Президентин зәрлгәс иштә Әрәсән улсин ниицлтин җиллә ирлцҗ бүрдәгдҗәнә.
Бамб цецгин наадмин өмн өргнд Элстд кесг талвңгуд экләд көдлв. Балһсна төвд Көглтин Даван бумблвин өөр шүлгләни марһан болв. Баатрмудын Аллейд болхла нег һазра арһлачнр кеҗ һарһсн эд-тавран, олн зүсн кегдлмүдән хулдв. Тер мет нертә көгҗмч Виктор Цой дүңгәҗәдг бумблвин өөр баһчуд гитар цокч, энүнә дуд дуулснь эргндән соңсгдв. Элстин төвд Долан хонгин күрән өмн баһ наста домбрчнр хальмг айсмуд күңкнүлҗ, зуульчнрин болн гиичнрин оньг авлв. Терүнәс нань тенд босхгдсн ишкә гермүдт хальмгудын авг-бәрцлә таньлдҗ, цаган сергмҗтәһәр давулх кем учрв.
Мана таңһчин тууҗ, сойл болн өвәрц йиртмҗ зуульчнриг соньмсулад, җил ирвәс эдн олар ирдг болв. Ода бийнь балһсна уульнцсар йовхла энд-тендәс ирсн олн гиичнр үзгднә. Улан дегтрт орулгдсн мана теегин кеермҗ болҗадг бамб цецгиг хадһллһн эн чинртә керг-үүлдврин һол күслнь мөн!
Эндр асхн Элстин Диилврин талвңд олн-әмтн цуглрхмн. Нарн мандлад дулан, сәәхн өдрчн болв. Байрин концертд үзүлгдсн наадна йовудт хар бамб цецгин домгин тускар келгдхмн. Эн керг-үүлдвриг Хальмгин ачта артист, режиссер Пурсяка Санҗ үүдәҗ һарһв. Өврмҗтә соньн эн нәр-нааднд Хальмгин нертә бичкдүдин сойлын коллективс, нертә артистнр болн дуучнр чигн бас орлцхмн.
Маңһдур болхла Москваһас һарсн «Цецгәрҗәдг тег» нертә зуульчллһна поезд Элстин төмр хаалһин вокзалд ирх зөвтә. Зуульчнр Бурхн Багшин Алтн сүм, Ноһан Дәркин көшә болн Элстин төвд бәәдг бумблвс хәләхмн.
Бамб цецгин наадм мана таңһчин сойлын болн зуульчллһна халхар давулгддг керг-үүлдврмүд дунд ончта орман эзлнә. Бүкл сара хонгтан таңһчин райодт бас ирлцңгү нәр бүрдәгдхмн. Мөрн сарин 11-д Целинн болн Үстин райод гиичнрән тосхмн. Дарук долан хонгин амрлһна өдрмүдт болхла Приютна, Хар Һазра, Баһ Дөрвдә, Городовиковск, Яшалтан, Яшкулин, Сарпан болн Көтчнрә райод бамб цецгин наадм давулхар зуралв. Ик Буурла, Лаганя болн Октябрьск райодт олна нәр мөрн сарин 25-д болхмн.
Тер мет мөрн сарин туршарт Элст балһснд талдан соньн керг-үүлдврмүд бүрдәгдх болв. Тедн дунд Хальмгин, ах-дү болсн Бурятин болн Тыван элчнрин орлцлһтаһар болх «МахнФест» наадмд, спортын олн зүсн марһаст олн-әмтн цуглрхнь лавта. Мөрн сарин 18-д Элстд «Бамб цецгин карнавал» гидг ке-сәәхн керг-үүлдвр давулгдх гиҗ күләгдҗәнә.
Таңһчин Толһач Хаска Батун темдглсәр, бамб цецгин наадм зуульчнрин дунд ик тааслт олсн керг-үүлдвр болна. Сүл җилмүдин туршарт хаврин байрт ирдг зуульчнрин то кесг холванд өсчәхнь бахмҗ үүдәнә.
Урдк кесг җилмүдин ашар бамб цецгин наадм Әрәсән хамгин соньн керг-үүлдврмүдин тоод орсмн. Эн нерән өөдән бәрҗ, мана тал ирх гиичнрт болн зуульчнрт таңһчин өвәрц тоотан цаарандан үзүлий!
Хальмгин райодт бүрдәгдсн керг-үүлдврмүдин тускар тодрхаһар даруһас зәңглхвидн.

КАРСАНА Евгения

Видео