Цугәрәсән марһанд орлцхмн

Элстин 25-ч бичкдүдин садын сурһмҗлач Шарманҗин Эллада шалтгта улсин «Абилимпикс» марһана ЮФО-н девсңд диилвр бәрәд ода Әрәсән дөрлдәнд белдҗәнә .
Элстин 25-ч тойгта «Дельфинчик» бичкдүдин садт хөрн һар җилдән багш-логопедәр Шарманҗин Эллада көдлҗәнә. «Абилимпикс» марһана тускар би урднь соңслав, болв терүнд орлцх саам учрҗасн уга билә. Одахн болхла садын һардвр терүнд арһ-чидлән сөрх селвг өгв. Талдан сурһмҗлачнрла дамшлтарн хувалцҗ, шин эв-арһс медҗ авх седкл намаг урмдулад, тер марһанд орлцхар шиидүв», - гиҗ Эллада Александровна мана күүндвриг эклв.
Бичкдүдин садын сурһмҗлачнр, олн җилдән хамдан көдлҗәдг Евгения Щепина болн Светлана Бондарцева марһана йовудт энүг дөңнв. «Түрүн болҗ тиим ик марһанд орлцлав, нанла кесг күн дөрлдв, тегәд невчк үүмәд бәәвв. Марһана йовудт бийиннь тускар келәд, дамшлтын ил кичәлмүд давуллав. Мана кичәлд бичкдүдин ормд Элстин багшин колледжин оютнр орлцҗ, даалһвриг түргәр күцәҗ дөң болв», - гиҗ таңһчин марһана йовудын тускар сурһмҗлач тодлв.
Элстин багшин колледжин педагогикин болн психологин багш, Анна Зарубина Эллада Александровнад сүв-селвг өгч эндүһинь чиклҗ медрлинь гүүдүлв. Ашлгч девсңгин хөөн жюри марһана дииләчин нер олнд соңсхч медүлв. Марһана йовудт нөкд болсн Анна Зарубина Шарманҗин Элладала хоюрн Ар үзгин Осетин Владикавказ балһснд йовхар белдв. Владикавказ эднд икәр таасгдв, кесг музейд, һәәхүлд эдн одад, Ар үзгин Осетин тууҗла болн авъясмудла өөрхнәр таньлдв.
Марһан болсн өдр Владикавказин оютнр Эллада Александровнад дамшлтын кичәлмүд бүрдәлһнд дөң болҗ, өгсн даалһвринь дигтә-даратаһар күцәв. Сурһульд орад уга бичкдүдт сурһмҗ өглһнә халхар гидг әңгд Хальмг Таңһчин элч билгән болн эв-дован үзүлв. Нег кемд бәәрн һазрин һардвр болн гиичнрин делегац марһана йовудыг хәләхәр ирв. Ар үзгин Осетин толһач Сергей Меняйло марһана даалһвр күцәхәр белдҗәсн Эллада Александровнала Хальмг Таңһчин, сурһмҗлачин көдлмшин, өрк-бүлин тускар күүндв. Тиим күндтә улсла харһхв гиҗ Элстәс ирсн багш нам санҗасмн уга, эн һардачин сурврар мана таңһчин тускар тодрха цәәлһвр өгв.
Тер харһлт Эллада Александровнад күцәмҗ бәрхд урмд өгв гиҗ сангдна. Өмн үзгин болн Ар Кавказин дуһргудын марһанд диилвр бәрснә туск байрарн Анна Зарубинала хувалцв. Ода Элстин 25-ч тойгта бичкдүдин садын багш-логопед Москвад болх «Абилимпикс-2026» Цугәрәсән марһанд белдҗәнә. Кесг җил хооран Хальмг Таңһчин элчнр тиим өөдән күцәмҗ бәрсн болдг. Ода болхла дәкнәс Шарманҗин Эллада ончрад, таңһчин нер туурултха гиҗ бидн дурдҗанавидн.
«Эллада Александровна мергҗлтән өөдлүллһнд һол оньган өгнә. Интерактивн наад олзллһна эв-арһиг сәәнәр меднә, дефектологудын Әрәсән ик хургт бас орлцна. Мана садын шишлң багд көдләд, эрмдгтә бичкдүдт келинь ясрулҗ көдлнә. Тиим нәрн мергҗлт болсн деерән бичкдүдт дөң күрглһнә кесг эв-арһ чадмгар олзлна. Чинртә марһана йовудт мана садын көдләчнр Эллада Александровнаг дөңнв, ода Әрәсән марһанд бас ончта күцәмҗ бәртхә», - гиҗ бичкдүдин садын ах сурһмҗлач Егоринә Людмила дурдв.
ТҮРВӘН Һуна