Сән чинртә малын хот кеҗ һарһхар

Сегодня, 13:17 | Общество, Таңһчин зәңгс, Зіњг, Сурєуль-эрдм

Селәнә эдл-аху делгрүллһнә, шин эв-арһс олзллһна халхар Хальмг ик сурһульд шинҗллтин ик көдлмш күцәгдҗәнә. Терүнә ашт таңһчин ик сурһуль Әрәсән регионмудла болн һазадын нутгудла нөкцлтән өргҗүләд йовна. Хальмг Таңһчин селәнә эдл-ахун болн мал өсклһнә төлә ик чинр зүүҗәдг малын хот белдлһнә туск төсв күцәлһнә көдлмш инженерин-технологин дацңд делгрҗәнә.
Тер шинҗллтиг техникин номин доктор, профессор Анатолий Лебедев талдан номтнрла хамдан күцәҗәнә, терүнә һардврт мал бордлһна шин эв-арһс олзлгддг болв. Хальмг ик сурһулин болн Лаганя районд бәәршлҗәдг «Булгун-Трейд-АГРО» кемҗәлгдсн дааврта бүрдәцин хоорнд малын хот һарһлһна халхар нөкцлтин бооцан батлгдв.
Энүнә йовудт номин шинҗллт, көк теңгсин көвәд урһдг хулснас малын хот кеҗ һарһлһна дамшлтын көдлмш күцәгдх. Хальмг ик сурһулин номтнр лабораторьт болн зоотехникин халхар шинҗллт кех, малын хотын чинрнь йилһгдхмн.
Тер керг күцәлһнә төлә хөөдиг дөрвн багд хуваһад 90 өдрин туршарт бордх. Профессор Анатолий Лебедевин үүдәсн эв-арһ олзлад, тер көдлмш күцәгдх. «Булгун-Трейд-АГРО» бүрдәцин улд тер шинҗллт давулгдхмн. Җилдән селәнә эдл-ахун бүрдәц 20 миңһн тонн малын хот кеҗ һарһна.
Өдгә цагин тиим эв-арһ малын хот һарһлһнд, таңһчин селәнә эдл-ахун болн мал өсклһнә делгрлтд нилчән күргхнь лавта. «Эндр терүнлә нөкцлтдг бүрдәцслә хамцу керг күцәлһн ик сурһулин төлә чинртәд тоолгдна. Бидн сурһулин үүлдвр күцәсн деерән хамгин түрүнд селәнә эдл-ахун делгрлтиг түргдүлхәр седҗәнәвидн. Мана таңһчин селәнә эдл-ахун болн нань чигн бүрдәцслә бидн нөкцлтән өргҗүләд бәәхвидн. Терүнә төлә мана лабораторин улд малын хотын шинҗллт кегдх», - гиҗ профессор Эвин Валерий темдглв.
Мана дөңгәр номтнр малын хот кеҗ һарһлһна туст шин эв-арһ үүдәхәр бәәхинь медәд теднә седвәринь дөңнләвидн. Бидн эднә төсв күцәлһнд сән таал тогтахар седҗәнәвидн, мана нөкцлтин ашт махна мал өсклһнә кергиг түргдүлҗ чадхвидн. Бидн Хальмг ик сурһулин һардач Салан Бадмла ик чинртә бооца батлад, нөкцлтән эклҗәнәвидн. Мана бүрдәц хөн сарин 29-д эдлврт орла. Көк теңгсин көвәд хулсн элвгәр урһҗана, терүг бидн кесг арвад җилин туршарт малын шимтә хот һарһлһна төлә олзлҗ чадҗанавидн», -гиҗ «Булгун - Трейд-АГРО» ООО-н һардач Кукана Җаңһр келв.
Хальмг ик сурһулин һардач Салан Бадмин үгәр, тиим нөкцлт цуг халхар олзта-орута болхнь лавта. Эн төсвс, экономиклә залһлдата болх зөвтә. «Мана ик сурһулин улд ферм секәд, бод мал болн хө асрад, дамшлтын көдлмш өргҗүлх таал бәәнә. Бүрдәмҗин кесг төр хаһлад, ода дамшлтын эдл-аху бүрдәлһнә төр хаһлхар седҗәнәвидн. Мана хамцу төсвиг күцәх медрлтә номтнр болн мергҗлтнр бәәнә».
Тиим кевәр Хальмг ик сурһуль номин, экономикин, селәнә эдл-ахун халхар шин төсв күцәҗ, таңһчин олз -оруг икдүлҗ, терүнә делгрлтд ач-тусан күргҗәнә. Иим нөкцлт сән ашта болтха! Хальмгт һарһсн малын хотыг талдан регионмудт болн нам һазадын орнд чигн хулдҗ авхар бәәнә, гиҗ номтнр болн шинҗләчнр темдглв.
ТҮРВӘН Һуна

Видео