Дегтрин саңгин көдләчнриг урмдулхар

Сегодня, 13:26 | Общество, Таңһчин зәңгс, Зіњг, Сурєуль-эрдм

«Медрл» олна ниицән Әрәсән гегән-герлин министерствлә хамдан «Әрәсән сурһулин сән гисн дегтрин саңгин көдләч» гидг марһа зарлв. Марһанд орлцхин төлә һаха сарин 30 күртл эрлһән орулх кергтә. Эн марһан Әрәсән Президент Владимир Путинә даалһврар бүрдәгдәд, сурһулин өдгә цага дегтрин саңгудын делгрлтд ач-тусан күргдг, бичкдүдин болн баһчудын төлә гегәрлтин төсвс күцәдг дегтрин саңгин көдләчнриг дөңнхин төлә зарлгдв.
Нидн түрүн болҗ давулгдсн марһанд орн-нутгин 89 регионас 2,8 миңһн элч орлцсн билә. Терүнә ашар 27 региона элчнр дундас 15 дииләч йилһгдәд, 28 күүнә үүлдвр онц темдглгдсн билә. Дииләчнрин сән гисн дамшлт ода орн-нутгин регионмудт өргнәр олзлгдҗана.
Әрәсән гегәрлтин министр Сергей Кравцовин келсәр, сурһульмудын дегтрин саңгудын делгрлтд ик оньг өггдҗәнә. «Медрл» олна ниицәнә һардач Максим Древаль эн марһан ик чинр зүүҗәхиг бас темдгләд, сурһулин улд үүлддг дегтрин саңгудын көдләчнрин кеҗ-күцәҗәдг көдлмш, эднә дамшлт сурһулин йовудт онц орм эзлҗәнә гив. Эн җил болх марһанд сән гисн мергҗлтнриг хамцулад, эднә нүүрлгч дамшлтыг орн-нутгин цуг сурһульмудт олзлх күсл тәвгдҗәнә гив.
Марһанд сурһулин бүрдәцин улд үүлддг дегтрин саңгудын көдләчнр орлцҗ чадҗана, дииләчнр һурвн багар йилһгдхмн. Тиигәд, 200 болн 500 күртл, 500-ас үлү күн сурчадг сурһулин бүрдәцс дунд онц дииләч шүүҗ авгдхмн. Марһанд орлцачнр сурһульчнр дунд гегәрлтин керг-үүлдврмүд давулх зөвтә. Тер мет эдн шинҗләчнрин хүүвд дегтрин саңгин делгрлтин туст хоршасн дамшлтын тускар келҗ өгхмн. Марһана ашлгч девсң Москва балһснд болхмн. 2026 җилин бар сард болх сурһулин дегтрмүдин саңгудын көдләчнрин ик хургт дииләчнрин нерд заагдхмн.

ДАВАН Наталья

Видео