«Сарин сарул» - Москвад

Сегодня, 11:55 | Общество, Таңһчин зәңгс, Зіњг, Сойл

Билг-эрдмин эн хәләвр олн дунд темдгтә. «Русское поле » гидг марһан 2012 җиләс авн орн-нутгин сойлын җирһлд ик чинртә орм эзлнә. Эн җил эн хәләвр Әрәсән улсин ниицлтин җилд нерәдгдҗ давв. Әмтнд тааста эн керг-үүлдврт дөрвн сай даву күн хәләсинь заахмн. Хар Һазра района сойлын төвин «Сарин сарул» гидг дууна коллектив терүнд орлцв.
Орн-нутгин үүдәгч 62 коллектив хәләвр-марһанд билг-эрдмән үзүлв. Терүнәс нань нааран ирсн әмтн улсин урн һарин эрдмчнрин кегдлмүдлә таньлдв. Шүлгчнр болн шүлг умшдг артистнр сойлын эн хәләврт орлцҗана. Келн-улсин хот-хол амсч, нег-негән тоодг йовдл энд бас учрв. Келн-улс болһна хувцна янзар белдгдсн өдгә цага хувцн ямаран соньн болв гиһит!
Дуунд дурта улсиг негдүлсн эн коллектив Комсомольский селәнд үүлднә. Хальмг Таңһчин сойлын ачта көдләч Эрднин Валентинан һардврт эдн дууна эрдмән делгрүләд йовна.
Хәләврт орх коллективсиг шүүҗ авсн кемд Харһазрахн үүдәгч сән гисн хөрн коллективсин тоод орсмн. Тиигәд Хальмгин дуучнр «Русское поле» марһанд орлцх зөв авсмн.
Москвад ноха сарин 22-т Поклонная уул деер бәәдг Диилврин паркд Хальмгин коллектив эрдмән үзүлхмн. Хотл балһсна әмтн болн гиичнр паркин кесг талвңд «Сарин сарул» дуулсн дуд соңсч, сергмҗтәһәр амрхмн. «Көгҗмин талвң», «Көгҗм цуглулдг бәәрн» болн «Авъясмуд үзүлдг һазр» гидг тәәз деер хальмг дуучнр сарул сәәхн айсмударн әмтиг байрлулхнь лавта.
ҖИРҺЛИН Кермн

Видео