Меклгдсн улсин то баһрҗахш

Сегодня, 12:10 | Общество, Таңһчин зәңгс

Өдр болһн таңһчин барин һарцст болн ниигмин сүлҗәнд мек-тах һарһдг улс әмтиг мекләд мөңгинь хулхалсна зәңг һарна. Һундл төрхд, өдр ирвәс меклгдсн улсин тонь өсәд йовна. Эн туст МВД-н көдләчнр мана иргнмүдт саг бәәхин туст кедү дәкҗ зәңглсн бийнь әмтн төртән авдго бәәдлтә.
Мек-тах һарһдг улс ямр чигн худлан келәд таңһчин әмтнәс мөңгинь некч авхар зүткнә. Таньдго улс җиңнүлхлә, бичә күүндтн гиҗ полицин көдләчнр саглсн бийнь әмтн цаарандан меклгдәд бәәнә.
Шидр таңһчин МВД-н зәңглсәр, нег һазра мана улс дәкнәс меклгдәд, кесг сай һар арслңган геев.
Ниигмин сүлҗәнд таңһчин министерствсин болн олн бүрдәцсин һардачнрин зургуд олзлад, хөөннь Әрәсән Төв банкин эс гиҗ зөв-йос харлһна көдләчнр болад җиңнүләд, әмтнә толһаһинь эргүлнә. Аштнь эгл улс, тер дотр мана медәтнр, худл-үнн зәңгинь медҗ чадлго, ик зуудан иткәд, бәәсн мөңгән илгәнә.
Сүл цагт полицин көдләчнр Элстин уульнцсар, лавксар, олн бүрдәцсәр йовҗ, мек-тах һарһлһна йовдлмудын тускар өргнәр зәңглнә. Таднд таньдго улс җиңнүлхлә эс гиҗ ниигмин сүлҗәнд бичхлә, иткхмн биш, бәрмт цаасна тоотынь сурхла, бас келхмн биш. Кемр тиим йовдлла харһхла, тер дарунь гилтә полицд зәңглтн, гиҗ зөв-йос харлһна көдләчнр дәкнәс тодлулҗана.

БАДМИН Занда

Видео