Хальмг һазр таасгдҗана

Сегодня, 11:15 | Общество, Таңһчин зәңгс, Зіњг

Эн җил Хальмг ик сурһулин 46 оютн Әрәсән Президентин болн орн-нутгин Залврин мөрәһәр ачлгдв. Иим ончта йовдл түрүн болҗ учрснь темдгтә. Мөрәлгдсн баһчуд дунд хальмг кел шинҗллһнә болн дорд үзгин күрәлң төгсәсн Елизавета Кузнецова заагдв. Билгтә оютн РФ-н Залврин мөрәһәр ачлгдад, сар болһн немр мөңг авхмн.

- Эн җил би корей болн китд келнә халхар Хальмг ик сурһулин бакалавриат төгсәләв. Цааранднь магистратурт сурһуль сурхв. Энд түрг янзта кел дасчанав. Тер мет ик сурһульд сурн бәәҗ өрәл җилдән Лаганя болн Ик Буурла райодын күүкдт корей кел зааҗ өгчәләв. Корей болн китд кел дүңцүләд номин халхар кесг статья бичләв. Дәкәд орс келнә болн утх-зокъялын багшнриг белдлһнә көтлврин сурһуль төгсәләв», - гиҗ Елизавета келнә.
Энүнә үгәр, Корейд одад, тенд бәәдг әмтнә бәәдл-җирһл үзәд, теднә авъясин болн сойлын туст немр медрл авад, корей кел гүүнәр дасхла туста болх бәәсмн. Эднд Корейәс ирсн профессор медрл өгчәсиг оютнр үнлҗәсмн. Ода Елизавета алтаистикин магистратурт сурчана, түрг келнә тууҗиг дасчана. Аш сүүлднь Елизавета кесг кел меддг мергҗлт болхмн.
Әрәсән Залврин мөрә авсна тускар күүкн ниигмин сүлҗәнд медв, эврәннь нер-усан үзәд Елизавета ик гидгәр байрлв. Тиим мөрә авх арһ бәәнә гиҗ Хальмг ик сурһулин номин әңг оютнрт медүлсн билә. Цуг бәрмт цаасиг яһҗ белдхин тускар чигн әңгин көдләчнр тодрхаһар цәәлһсн болдг.
Елизавета бийнь Владимирск мүҗин, Муром балһснас ирҗ Элстд дөрвн җилдән сурчана. Хальмг Таңһч энүнд икәр таасгдҗана, энд кесг үр-иньгтә болв. Хамдан Муромин сурһульд сурчасн үүрмүдтәһән чигн Елизавета дару-дарунь харһна, үүрмүднь кесг балһсдын ик сурһульмудт сурчана, күүкн Хальмг Таңһчин тускар келн-улсин авъясмудын, сойлын тускар эднд келҗ өгнә. Хальмг ик сурһульд гүн медрл авчахнь чигн бахмҗ үүдәнә.
Ода Хальмг ик сурһульд талдан регионмудас, нам һазадын орн-нутгудас ирсн оютнр хоорндан ниитәһәр бәәҗ, кесг эрдм дасчана. Хөөннь Хальмг Таңһчд сурчасн цаган бүләнәр тодлҗ, келн-улсин хоорндк хәрлцә батруллһнд туслхнь лавта. Хальмг ик сурһуль кесг орн-нутгудла залһлда бәрҗ, номин, сурһуль-эрдмин болн иньгллтин халхар нөкцлтән делгрүлҗ йовна.
ҖААХАН Бадм

Видео