Баһчудын иньгллт делгртхә!

Сегодня, 11:40 | Общество, Таңһчин зәңгс, Зіњг

Эн өдрмүдт Екатеринбург балһснд баһчудын болн оютнрин нарт-делкән наадм болв. Хальмг Таңһчиг энд Хальмг ик сурһулин оютнр элчлв. Мана делегациг ик сурһулин һардачин дарук Мингиян Надбитов һардҗана.

Волонтермуд - багшин дацңгин магистрант Марина Лушникова болн экономикин дацңгин оютн Басана Юлия, хальмг келнә күрәлңгин магистрант Елизавета Кузнецова, гуманитарн дацңгин магистрант Тугульчин Бадм, залврин болн зөвин дацңгин оютн Топора Баина болн багшин дацңгин магистрант Пүрбән Сангир делегацин ханьд йовв.
Эдн талдан орн-нутгудас болн олн һазрас ирсн баһчудла болн оютнрла дамшлтарн хувалцҗ, баһчудын политикин, номин болн сурһуль-эрдмин төрмүдәр болсн күүндврт орлцв. Эврәннь үүлдврин тускар эдн ахрар бас келв.
«Бидн ЭКСПО һәәхүлин һазрт одвидн, нааран кесг гиичнр ирсн бәәнә, тер тоод делкән нертә компаньсин кесг талвңгуд энд үүлдҗәнә. Һазадын орна кесг баһчудла таньлдад, нег-негән дөңнәд, хөөннь өргн нөкцлт делгрүлх санан бәәнә», - гиҗ Тугульчин Бадм зәңглв.
- Кесг орн-нутгин элчнрлә таньлдад, ямр чигн төрәр тоолвран келҗ болҗана, тиим сән-сәәхн бәәдл намаг байрлулв, - гиҗ Елизавета Кузнецова келв.
Пүрбән Сангирин үгәр болхла, нааран ирх селвг үүрмүднь өгч. Кесг күүнлә күүндәд соньн тоот медҗ авад, таньл-үзлән, үүрмүдән олҗ авснь бахмҗта болҗ.
Ут турштан эн наадмд 191 орн-нутгас 10 миңһн күн орлцв, 2000 нертә артист эн керг-үүлдврт билг-эрдмән үзүлв. Наадм һаха сарин 13-д байрин бәәдлд секгдсмн, эндр болхла наадмин көдлмш төгсхмн.

ТҮРВӘН Һуна

Видео