Әрәсән болн Моңһлын хоорндк хург болв

Сегодня, 11:43 | Общество, Таңһчин зәңгс, Зіњг

Һаха сарин 14-15-д Улан Баатр балһснд Әрәсән болн Моңһлын регионмудын хоорнд экономикин залһлда делгрүллһнә төрәр II хург болв. Йосна бүрдәцсин, бизнесин элчнр, шинҗләчнр, ут тоодан Әрәсән болн Моңһлын 220 элч эн хургин көдлмшт орлцв.

Хойрдад давулгдсн хургин йовудт Евразийд көлгнә залһлда делгрүллһнә, зуульчллһна, хулд-гүүлгәнә, сурһуль-эрдмин болн талдан төрмүд босхгдв.
Орн-нутгин Залврин Ахлачин дарук Алексей Оверчук Әрәсән делегациг һардв. Хургин сүүрин йовудт эн хойр орн-нутгин хоорндк нөкцлтин тускар тодрхаһар келв. Энүнә темдглсәр, 2025 җилин ашар хулд-гүүлгәнә кемҗән дөрвн процентд өсв, эн җилин түрүн зурһан сарин туршт болхла эн кемҗән 18 процентд өсв. Эн җилин така сарин 22-т Евразийин экономикин ниицәнә ханьд ордг орн-нутгудын болн Моңһлын хоорнд хулд-гүүлгәнә халхар батлгдсн бооца күцәлһнә йовудт эн залһлдан цааранднь делгрхнь лавта. Энүнә ирлцҗ Әрәсән регионмудас хөөнә ноосн, арсн болн малын махн тиигәрән йовулгдҗ хулдгдхмн.
Тер мет мана орн-нутг Моңһлыг тосн-түләһәр бас теткҗәнә. «Улан Баатрин төмр хаалһ» нертә бүрдәц үүлдврән делгрүләд, эн хаалһар йовдг улсин то өдр ирвәс икдәд йовна. Хойр орн-нутгин хоорнд зуульчллһиг улм делгрүлхин төлә Москван болн Улан Баатрин хоорнд аһарин залһлдаг цааранднь делгрүлхин туст күүндвр бас болв. Әрәсән 19 регион «Цәәһин хаалһ» нертә төсв күцәлһнд орлцхдан белн бәәнә.
Сурһуль-эрдмин халхар болхла 2026-2027 сурһулин җилд Моңһлын оютнрин төлә мана орн-нутгин ик сурһульмуд 620 орм йилһв. Тер мет Улан Баатрт орс-моңһл сурһульмудт орс кел даслһна чинриг улм өөдлүлх кергтә гисн төр бас босхгдв.
Әрәсән делегацин ханьд Хальмг Таңһчин элчнр орснь темдгтә болв. Хальмгин залврин Ахлачин дарук – то-дигин делгрлтин министр Этән Алексей, сойлын болн зуульчллһна министр Бембин Евгений болн таңһчин Толһачин селвгч Салыка Владимир чинртә хургт орлцв.
– Мадна төлә Моңһл ахнр-дүүнр болҗадг орн-нутг болна. Нег тууҗ-сойл, авг-бәрц мадниг хамцулна. Өдгә цагт сурһуль-эрдмин, зуульчллһна, сойлын, баһчудын болн спортын халхар хамцу төсвсән күцәһәд, нөкцлтән делгрүлхәр зүткчәнәвидн, – гиҗ Этән Алексей темдглсн болдг.
Тодлхас, нидн бар сард ирлцңгү түрүн хург Иркутск балһснд болла. Хальмг Таңһчин төлә иим керг-үүлдврт орлцлһн чинртә болдг, тер юңгад гихлә Моңһлын орн-нутгла тогтсн залһлдан улм батрулад, цааранднь делгрүлҗ болхнь лавта. Ик хургин ашар Әрәсән болн Моңһлын регионмудын хоорнд чинртә олн бооцас батлгдв.
КАРСАНА Евгения

Видео