Нертә шүлгчин номин үүлдвр

Шидр Б.Б.Городовиковин нертә Хальмг ик сурһульд олна үүлдәч Санҗин Николайин 70 җилин өөнд нерәдсн «төгрг ширән» сүүр болв. Энүнд хальмг кел-бичгин болн дорд үзгин шинҗллтин күрәлңгин оютнр, Николай Джамбуловичин үүрмүднь, тер тоод таңһчин сойлын болн зуульчллһна министрин дарук Санҗрһа Герман, хамдан ик сурһульд сурч йовсн Санҗин Сергей болн Әрәсән бичәчнрин ниицәнә Хальмг Таңһчин әңгин ахлач Бадака Татьяна, профессормуд Улана Санл Мушан Владимир хойр тодлврарн хувалцҗ, бичәчин болн номин үүлдврин тускар келҗ өгв.
«Төгрг ширән» сүүриг хальмг келнә күрәлңгин һардач Лиҗин Мингиян һардҗ давулв.
– Николай Джамбулович шүлгч болсн деерән сойлын халхин номин кандидат бәәсмн. Тиигәд утх-зокъялын болн олна үүлдврән номин көдлмшлә дегц күцәҗәсмн. Кесг җилдән Хальмг ик сурһулин багшар көдлв. Хальмг Таңһчин тууҗин болн сойлын халхин тускар күрәлңгин оютнрт лекц умшҗасн болдг», – гиҗ Мингиян Алексеевич тодлв.
Шүлгч болсн деерән хальмг утх-зокъялын шинҗллһнд оньган тусхасмн.
Калян Санҗин, Манҗин Нимгрә, Сән-Белгинә Хасрин, Нармин Морхаҗин болн нань чигн кесг талдан бичәчнрин үүдәврмүдт нерәдсн статьяс шишлң седкүлмүдт болн газетмүдт барлҗасмн.
Николай Джамбуловичлә хамдан хальмг утх-зокъялын туск статья тодлнав. Тер статья белн бәәсмн, Әрәсән келн-улсин утх-зокъялын туск хураңһуд тер шинҗллт орх зөвтә бәәсмн.
Николай Джамбулович цуг көдлмшиг дигтә-даратаһар күцәҗ, кесг соньн тоотыг умшачнрт медүлв. Мана Хальмг ик сурһульд таңһчин хургуд давулсн кемд Санҗин Николай медрләрн хувалцдг билә.
Хальмг улсин сойл-авъясиг Санҗин Николай сәәнәр меддг учрар оютнриг шинҗллһнә көдлмшт орлцулҗала, гиҗ күрәлңгин һардач ашлв.
ТҮРВӘН Һуна