Төрскнч седклтә иргнмүдиг өскхәр

29-10-2026, 09:50 | Общество, Таңһчин зәңгс, Зіњг

Одахн Элстин Т.Симин нертә 21-ч тойгта дунд сурһульд эклц классмудын сурһульчнриг олна керг-үүлдврт яһҗ орлцулхин, теднд чик сурһмҗ өгхин тускар багшнр селвлцв. Сурһуль-эрдмин мергҗлтнр энд одахн болсн таңһчин хургин йовудт «Орленок –эрудит» болн «Орленок-лидер» көтлврмүдиг яһҗ олзлхин тускар дамшлтарн хувалцв.

Эн хойр көтлвр яһҗ күцәгдҗәхин тускар «Орлята России» төсв күцәҗәдг 21-ч тойгта сурһулин багшнр тодрхаһар келҗ өгв. Эдн 2-4-ч классмудын сурһульчнрин билг-эрдминь өргҗүллһнә, медрлинь гүүдүллһнә кесг эв-арһ олзлна, тегәд эн халхар хоршасн дамшлтан үзүлв. Бичкдүдиг хамцуллһна керг-үүлдврмүдин тускар эдн бас күүндв, эдн хамдан олн зүсн даалһвр күцәҗ, нег багин ханьд ниитәһәр үүлддгиг дасна. Иим эв-арһ сурһульчнриг хамцуллһнд туста болна. Харһлтын йовудт хоршасн дамшлт талдан сурһульмудын багшнрт болн һардачнрин селвгчнрт бас таасгдҗ, тедниг икәр соньмсулв. Бичкдүдиг олн төсвд орлцуллһна, теднд төрскнч сурһмҗ өглһнә туст кеҗәдг көдлмшиннь тускар эдн келв. Тиим кевәр «Орлята России» көтлвр эклц классмудын сурһульчнрин сурһмҗллһнд сән нилчән күргҗ, седвәртә үүлдвр күцәхд туслна гиҗ хургт орлцачнр темдглв.
«Навигаторы детства» Цугәрәсән төсвин таңһчин зүүцүләч Саранкан Екатерина, таңһчин сурһуль-эрдмин болн номин министерствин әңгин нүүрлгч мергҗлт Амулака Фаина, 21-ч тойгта дунд сурһулин һардач Поштарикә Андрей, «Орлята России» көтлврин таңһчин зүүцүләч Чензән Татьяна күүндврт босхгдсн төрәр селвгән өгч,мергҗлтнрт көдлмштнь күцәмҗ дурдв.
«Багш болһн шин эв-арһс көдлмштән олзлх зөвтә. Тер мет күүкдт сурһмҗ өглһнә көдлмшт терүг яһҗ олзлдгиг дасч авх кергтә. Сурһульч болһна билг-эрдминь делгрүллһнд бидн нөкд болх, седвәртә, шунлтта, төрскнч седклтә бичкдүдиг өскх зөвтәвидн. Эн хургиг бүрдәһәд, гиичнрән бүләнәр тоссн, дамшлтарн чигн хувалцҗ багшнрин белдвриг өөдлүллһнд сән нилчән күргҗәдг сурһулин көдләчнрт ханлтан өргҗәнәв. Мана таңһчд «Навигаторы детства» гидг Цугәрәсән төсвд орлцҗадг сурһульмудын то өсәд йовхнь байрта. Эн җил 53 сурһуль немгдв, тиим кевәр таңһчд ода эн төсв күцәлһнд 125 сурһуль орлцҗ, сән йовудтаһар үүлдҗәнә. 2027 җиләс авн бас 34 сурһуль эн төсв күцәхәр зуралҗана. Терүнә ашт селвгчнрин зерглән чигн өргҗәд йовна. Шин ирсн мергҗлтнриг сурһхин төлә Элстд шишлң сурһуль бүрдәгдлә», - гиҗ Саранкан Екатерина йөрәлин үгдән темдглв.
«Движение первых» җисәнлә эдн өргнәр нөкцҗ ниитәһәр үүлднә. Җисәнә бүрдәцсин марһан эн җил зарлгдсн билә. Терүнд Элстин олн салврта гимназин бүрдәц болн терүнә ахлач Бадыша Наталья түрүн орм эзләд, 500 миңһн арслңга мөрәһәр ачлгдла. Тер мөңгәр эдн бүрдәцин төлә өдгә цагин кергсл болн өлг-эд хулдҗ авв. Тиигәд таңһчин сурһульмудт олна бүрдәцсин нилчәр бичкдүд болн арвтнр дунд сурһмҗин көдлмш делгрәд йовна.
«Навигаторы детства» төсвиг орн-нутгин Әрәсән бичкдүдин төв болн Әрәсән гегән-герлин Министерств дөңнҗәнә. Тиим кевәр «Орлята России» көтлвр таңһчин сурһульмудт улм өргнәр күцәгдх, терүнә төлә цуг таал бәәнә гиҗ ашлҗ болхмн.
ТҮРВӘН Һуна

Видео