Тґрскін харсачнриг энд ґскні

Сентябрь сарин эклцір Городовиковск балєснд Хазгудын кадетск корпус секгдлі. Иим сурєуль-эрдмин заведень мана тањєчд тўрўн болљ секгдв. Хазгудын Кадетск Корпусиг майор Валерий Абушинов єардљана.

Валерий Иванович Городовиковск балєснд ґссн-боссн кўн. Єурвдгч класс тґгсіхлінь эк-эцкинь Ик Буурла районур кґдлмшт йовулсмн. 1979 љил Ик Буурла района дундын школыг тґгсісніннь хґґн Саратовск областьд біідг авиацин маршал Новиковин нерті цергі авиационн училищд орљ сурв. 1983 љил авиационн училищиг тґгсіхлінь энўнд училищин сурєулин полкд кґдлх ўрвр кесмн. Тегід эндін ўлдід, арвн љилин туршарт авиационн инструкторар училищд кґдлљ йовсмн. Инструкторар кґдлсн цаган курсантнриг кґлгн-кўчні самолетар нисдг дасхдг біісмн. Зуг 1993 љил Советск Союз тархла авиацин майор Валерий Абушинов кґдлмш уга ўлдв.

Тер цагт кесг ґґдін дамшлтта, мергљлтті улс иим біідлд тусв. Тегід удан боллго Валерий Хальмг єазртан ирв. Элстд зарєин приставар кґдлдг болв. Кґдлмштін кўцімљ бірљ ўўлддг тґліднь энўг ахлгч специалистір тівні. Тиим болв чигн тґрскн єазрурн одх санан хайдго билі. Тегід 2012 љил Городовиковск балєсна ДОСААФ-иг єардх ўрвр энўнд района єардвр кехлі Абушинов тер дарунь зґвін ґгід, шин кґдлмшт орсмн.

Района єардвр кезініс хазгудын кадетск корпус секх саната билі, зуг энўг єардх кўн уга билі. Цергі дамшлтта Валерий Абушиновд эн дааврта керг даалєв.

Тер цагас нааран нег сар давв, тиим болв чигн энд кґдлмш дигті-даратаєар кўцігдљіхиг темдглх кергті. Эндр ґдр корпуст 40 кґвўн сурчана. Эдн цуєар 6-ч классин сурєульчнр. 13 кґвўн Городовиковск балєснас, 7-нь Элстіс, наадкснь тањєчин райодас. Кґвўд Городовиковск балєсна 2-ч тойгта дундын школд сурна, терўні хґґн корпустан ирід, немр сурєуль дасна. Ґдгі цагт кадетнр корпустан сурєуль сурдг арє уга, тегід 2016 љил сурєулин болн унтдг шин корпусмуд тосхгдхмн. Ода энўні тґлі проектн-сметн документац белдљіні.

Ўдин хґґніс авн асхн кўртл кадетнр дііні керг дасна, спортивн халхар белдні, биилдг чигн дасна. Багшнрнь эднд кўч-кґлсні сурємљ ґгні. Асхни хотын хґґн сул цаг учрхла, эк-эцкнртін љињнўлх зґв кґвўдт ґггдні. Кадетнриг ґдрт зурєан дікљ хотар теткні. Дамшлтта замчнр эднд сін чинрті хот чанна. Хот уудг хора ик, сарул, дегц 110 кўн багтх зґвті.

Хазгудын кадетск корпус сексн кемлі 24 кадет тал эк-эцкнь ирсн бііљ. Тедн унтдг, хот уудг, сурєулян сурдг хорас ўзід кґвўдтнь тогтасн таалыг таасв. Сурємљлачнрла ґґрхн таньдлдв. Кадетск корпуст ут тоодан 45 кўн кґдлні. Замчнр, эмчнр, нань чигн специалистнр. Цуєар ґґдін дамшлтта, эрдмдін дурта улс. Сурємљлачар энд зуг залу улс кґдлні. Ах сурємљлачин медлд тавн кўн орна. Эдн цуєар ґґдін эрдмті, мергљлтті, дамшлтта улс. Сурємљлачнр хоорндан дамшлтарн хувалцљ, кадетнриг дасхна. Эн керг амр биш, гиљ эдн келні. Тиим болв чигн эднд иим диг-дарата біідл таасгдна. Љил болєн Хазгудын кадетск корпуст 40 кґвўд орхмн. Тиим дала кадетнриг сурєхд энд цуг таал бііні.

Эн љилин сентябрь сарин 27-д Городовиковск балєсна сін ґдр ґргір темдглгдхмн. Эн ґдр кадетнрт хойр дам байрта болх. Эдн Советск Союзин Герой, генерал - полковник О.И.Городовиковин бумбин ґґр хазгудын андєаран ґгсн деерін, корпуст Ока Иванович Городовиковин нерн зўўлєгдхмн.

Келхд, Хальмгт иим корпус шинкн секгдід ўўлдврін эклљіні. Тґрскндін дурта, чањє-чиирг кадетнриг ґскхин тґлі энд цуг таал бііні. Кадетнрин эк-эцкнрт, элгн-саднднь кґвўдтін зовад керг уга. Эдниг седклін тівљ, олн љилин эргцд тањєчин сурєуль-эрдм делгрўлєнд ик тівцін орулљ йовх медрлті, дамшлтта улс сурєљана.