Уйн наста шатрчнрт

Одахн Хальмгт ўўлддг «Ростелеком» компаня кґдлічнр Элст балєсна А.Г.Сергиенкон нерті 3-ч тойгта дундын школд нарт-делкін гроссмейстер Татьяна Степован «Тигренок в шахматном королевстве» гидг сііхн зургудта 100 дегтр белглв. Бичкдўдин садт орљах болн эклц классин кўўкд-кґвўд эн дегтрмўдір шатр нааддг дасч чадхмн.

Эн компаня Хальмг филиалын єардач Арслан Корняковин келсір, компань социальн седвірт ик оньган тусхана, тер тоод билгті бичкдўдт болн баєчудт. Элст балєсна 3-ч тойгта дундын школ хотл балєсна школмудын дунд бичкдўдт шатр даслєар тўрўн школ гиљ тоолгдна.Энд нарт-делкін гроссмейстер Б.Кованова сурч йовсмн, ода шатрар Ірісін чемпионк Динара Дорджиева сурчана. Тегід хамгин сін Ірісін шатрч Татьяна Степован бичсн дегтр шатрар шин чемпионмудыг ґскхд ик нилчін кўргхнь маєд уга.

Сііхн ґњгті дегтрмўд белглсн кемлі школын директор Светлана Кукаева ўг авад: «Хальмгт мґрні урлдан, бґк бірлдін, саадгар халєн болн келн -улсин шатр наадлєн дегц делгрлт авсмн гиљ тоолгдна. Эндр мана школын сурєульч болєн шатр наадна. Эн дегтрмўд кўўкд-кґвўдт ик дґњгін кўргх», - гиљ «Ростелеком» компаньд ханлтан ґргв. Темдглхд, эн компань «РОСТ. Рост личности. Рост общества. Рост бизнеса» гидг дуудврар єардвр кељ ўўлдні. Тегід компань билгті баєчудыг, бичкдўдиг дґњнід, олн зўсн седвір татад, эдні ґслтд, делгрлтд нилчін кўргні.