Элстихн байран темдглв

Ґдгі цагт Элст сурєуль-эрдмин, номин, сойлын цутхлњ болљахнь мґн. Эндр ґдр федеральн болн муниципальн программс кўцілєні йовудт балєснд ґдгі цагин некврлі ирлцљіх гер-бўўр, бичкдўдин садмуд тосхгдљана, школмуд шинрўлгдљіні, хаалєс ясгдљана. Ґдгі цагт Элст ґвірц, кецў сііхн балєсн мґн. Энд олн келн-улс хоорндан ниитієір бііљ, эвріннь келін, авъясмудан ірўнір хадєлљ, сойлан, зањшалмудан делгрўлні. Болв балєсна эркн зґґрнь болљахнь энтн біірн імтн. Седвірті, шунмєа, билгті элстихн тањєчин социальн-экономическ, олна, сойлын, болн спортивн біідл-љирєлд шунмєаєар орлцљ, эвріннь ончта кўцімљірн тањєчин нер дуудулљ, тањєчин делгрлтд болн цецгірлтд нилчін кўргні.

Давсн бембі ґдр элстихн тґрскн балєснаннь Ґдрін темдглв. Балєсна Ґдр элстихні хамгин дурта байр. Эн байр цугтаєинь негдўлљ ниицўлні, бахмљ ўўдіні. Олн імтн эврі кўч-кґлсірн, билгірн, шунлтарн ончрад, Элстин неринь туурулљ, энўні делгрлтд тівцін орулљ йовна. Намрин чилгр, нарта ґдрлі элстихн ґрк-бўлірн «Иньгллт» паркд, Диилврин талвњд ирв. Энд Элст ўўдсні ґдрт нерідгдсн байрин керг-ўўлдврмўд давв. Балєсна дундын школмудын болн бичкдўдин садмудын урн єарин эрдмин єііхўл олна оньг авлв. Імтн єііхўл эргід, єартан ґґті эрдмчнрин ончта сііхн кегдлмўд єііхљ икір соньмсв.

Сергмљті кґгљм кўњкнід біів. «Хідрис» ансамбль болн «Тюльпанчик» ансамбльмуд хальмг би биилід, керг-ўўлдвр эклв. Элст балєсна толєач, Элст балєсна Хургин депутатнрин ахлач Вячеслав Намруев, Элст балєсна администрацин толєачин ўўлиг дав зуур дааљах Артур Дорджиев цугрлсн улсиг йґріљ, хотл балєсиг тосхсн, тууврин хґґн шиніс сергіљ босхсн ах ўйин улсин ач-тусинь темдглљ, эднд ханлтан ґргв. Љил ирвіс Элст улм сііхрід, шинрід бііні. Шин гермўд, бичкдўдин садмуд эдлврт орулгдљана, хаалєс ясгдљана. Болв хаєлх тґрмўд ода чигн бііні. Зуг цуєар чидлін негдўлљ, хамцу ўўлдхлі балєсна тґлі цугинь кехмн. Иргчдін мана балєсн орн-нутгтан биш орчлњд хамгин сін-сііхн болтха. Элстд цаєан саната, делгў седклті улс бііні. Цуєар эрўл-менд, байрта-бахта, тґвкнўн, эвин біідлд бііхиг дурдв.

Элстд кўч-кґлсірн, керг-ўўлірн ончрсн онц улс бііні. Эдн дунд багшнр болн эмчнр, спортсменмўд болн олна ўўлдічнр, селіні эдл-ахун болн сойлын, коммунальн туслмљин болн кґлгн-кўчні халхин кґдлічнр балєсна делгрлтд болн цецгірлтд аєу ик тівцін орулсмн. Элст балєсна кўндті иргнмўдин цол зўўљіх тоомсрта медітнриг тііз деер дуудулад єарєљ, эдниг олна чирід йґріљ, белгўд бірўлљ ґгв. Сурєуль-эрдмин халхин делгрлтд тівцін орулљах болн баєчудт цергі-патриотическ сурємљ ґгчіх тґліднь Тґрскін харсгч Алдр дііні ветеран Вера Петровна Ивановад Элст балєсна кўндті иргні цол зўўлєгдв.

Сін авъяст тохрсар Элст ўўдсні ґдр баєчуд ґргмљті біідлд ґркін ґнділєљ, иткл цаасан авна. Эн ґдр чигн баахн улс олна нўўрт нег-негндін дурта, нег-негндін итклті болдган иткўлљ, хґвін ниицўлљ ханьцад, љирєлін залєв. Балєсна єардачнр эдниг йґріљ, наснаннь туршарт тиим сііхн біідлін, дуран хадєлљ, нег-негнлірн љирєљ, ґлзіті ґрк-бўл болтха гиљ дурдв. Дарунь Хальмг цутхлњ хурлын лам шинкін гер-бўл болсн баєчудыг йґріљ, ґлзі-кишг дурдљ, ном умшв.

Элстин болн Хальмгин архиепископ Юстиниан Муромск ірўн Петрин болн Феврониян тууљ тодлулљ келід, эдні ўлгўрір бііљ, тиим кевір нег-негндін итклті болн дурта болхиг дурдљ, белгін нерідв. Тер мет єучн љилдін хамдан бііх Михаил болн Ольга Лапшиніхні ґрк-бўл баєчудыг йґріљ, љирєлин хаалєд харєх кўчр-кўндиг хамдан дааєад, нииті, бат ґрк-бўл болтха гиљ дурдв. Элстихн йґрілднь багтад, шин ґрк-бўлін тогтасн баахн улсин байринь хувалцв. Шинкін гер-бўл болсн баєчуд тўрўн бииєін биилљ, імтні седклд нар урєав.

Элстд олн келн-улсин элчнр хоорндан таартаєар, ниитієір бііні. Байрин йовудт хасг, дагестанск, чеченск, азербайджанск, нань чигн келн-улсин олна ниицісин ахлачнр бас цуглрсн улсиг байрла йґріљ, хґв-кишг, амулњ менд, тґвкнўн љирєл дурдв.

Ўлгўр-ўзмљ болгч ансамбль «Тюльпанчик», «Карусель» бичкдўдин студь, «Теегин айс» бичкдўдин вокальн студь, «Веснушки» бичкдўдин ансамбль, «Тењгрин ки» бичкдўдин студь билг-эрдмін ўзўлљ, цугтаднь байр ўўдів. Тер мет кўўкд-кґвўдин тґлі соньн, сергмљті наадд, марєас бўрдігдв. Балєсна болн тањєчин ўўдігч коллективс, тер дотр ду-бииєин «Бамб цецг», «Торєа», «Степняночка» ансамбльмуд билг-эрдмін ўзўлљ, імтні седкл авлв.

Элстихн болн хотл балєсна гиичнр ик-бає уга сергмљтієір цаган давулв. Байрин чилгчір сііхн фейерверк болв, деер тењгрт зўсн-зўўл ґњгті єал падрљ ґврмљ ўўдів.