Генерал-полковникин өөнд нерәдв

Сән авъяст тохрсар давсн долан хонгин бембә өдр таңһчин казначеймүд Целинн района «Сайгачонок» нертә бичкдүдин лагерин ул деер «Алтн намр - 2014» гидг керг-үүлдвр бүрдәв. Нарта, дулан чигн өдр болад, эн байр өөдән кемҗәнд давулгдв. Эн өдрмүдт мана таңһчд Советск Союзин Герой, генерал-полковник Ока Иванович Городовиковин 135-гч җилин өөн өргәр темдглгдҗәнә.Казначеймүд бас эн керг-үүлдврән Хальмгин нертә Геройин өөнлә залһлдулҗ давулснь ончта болв. Баһчуд Ока Городовиковин намтрин тускар тодрхаһар келәд, энүнә бәәдл-җирһлд болн үүдәлтд нерәдсн эрсин газет белдсән олнд үзүлв.

Хальмг Таңһчар үүлддг Федеральн казначействин Заллтын һардач Эрдне Пашнанов цуглрсн улсиг йөрәһәд, эн өдр бүрдәгдсн марһаст орлцх 5 командын гешүдт күцәмҗ дурдв. Җил болһн намрар болдг эн нәәрт таңһчин казначействин ачта ветеранмуд орлцдгнь бас кеермҗтә болна. Олн җилдән үнн-чик седклтәһәр көдләд, ач-тус күргсн төләднь медәтнрән күндлҗ ханлтан өргәд белгүдән эднд нерәднә. Келхәс, эн байриг казначействин Баһчудын совет һардҗ давулснь орта болв, яһад гихлә одахн гилтә баһ наста казначеймүд эврә советин 5 җилин өөнән темдглсн билә.

Баһчуд дунд төрскнч седкл сурһмҗллһна, эврә һазр-усндан дурта болдг седкл зүүлһлһнә күслтәһәр давулгдсн «Дәәнә мюзикл» гидг марһан, ду-бииһин флешмоб зөвәр инәдтә, шуугата болв. Командын гешүд сенр, шимтә хот-хол белдҗ бас марһв. Программин чилгчәр болсн ГТО-н марһанд ик-баһ уга цуг казначеймүд орлцснь темдгтә болв. Залус болн күүкд улс 1000 болн 100 метрт гүүһәд, утдан һәрәдәд, саадгар хаһад марһлдв.

Марһасин ашар олн зүсн номинацст ончрсн улсиг Эрдне Лиджиевич йөрәһәд, белгүд бәрүлв. «Дәәнә мюзиклд» «Т-34» команд, флешмобин болн ГТО-н марһаст «Спартанцы» команд диилвр бәрв. «N» командын гешүд болхла цугтаһаснь әмтәхн, шимтә хот кесн болҗ һарв. Келхд, ирлцңгү марһанд белдсн зүсн-зүүл хотыг цугтан амсад бәәтл, зәрмстнь нам күртсн уга.

Өдрин дуусн гилтә эн нәр-наадн давв, бульчңһан чаңһаһад, чидлән сөрсн деерән казначеймүд нег-негнләрн харһҗ, амрлһна өдрән сергмҗтәһәр давулҗ чадв. Э. Пашнанов хамдан көдлҗәх үүрмүдән йөрәхләрн, онц «Спартанцы», «Спецназ», «N» командсин гешүдт ханлтан өргҗ мөрәлв. Диилвр бәрхәр зүтксн «Легион» команд болхла шишлң дипломар ачлгдв.

Эн керг-үүлдврт орлцсн Федеральн казначействин Заллтын Олна Советин гешүдин нерн деерәс профессор, КГУ-н проректор Эльза Мантаева йөрәлин үг келв.Эрдне Лиджиевич болхла Эльза Ивановнаг Элст балһсна Советин депутатд суңһгдснлань йөрәһәд, сәәхн цецгүд бәрүлҗ өгв.