Багшнртан өргҗәх ханлт

Би күмни әмтни җирһлин хормаһас татҗ өндәсн цагас нааран кесг цаг давв. Ода эндрин цага өөдм деерәс хәрү эргәд хәләхлә – ик холд, тенд – Цаһан Нур, Цаһан-нуурин школ, мана эңкр багшнр.

Эңкрлн келҗ-келҗ, нам аш сүүлднь, багш болх мини хаалһин эклц мел дигтә тендәс - Цаһан-нуурин школас, багшнрас авн үүдснь нанд, бийдм ил медгдҗәнә. Школм, багшнрм нанд лавта, сәәни эклц болҗ һарсмн.

Тиигҗ би багшин эрдм сурад, Сарул селәнд ирҗ багшлув. Терүнәс нааран һуч шаху җил давв. Эн кишгтә һазрт би күн болад, алтн болсн хойр көвүдән кү кеҗ өскүв. Эңкр өрк-бүлтәһән, седкл тааста көдлмштәһән, ухан-санаһим дахсн сурһульчнртаһан җирһлин хаалһар, әмтнәс ард цухрлго йовнав.

Цуг эн хамгиг авад хәләһәд, ухалад, тоолад дүңцүлхлә – цуг эн тоотыг күцц үнлҗ болшго. Учрсн кишгиг күндлҗ эдлх кергтә гиҗ санҗанав. Күндтә эврә багшнртан әрүн седкләсн ханлтан өргҗәнәв. Ода эднән амлад, нердүдинь келх дурн бәәнә: Анюшева Улан Лиджиевна, Мутляев Эренджен Хазыкович, Санджиева Раиса Манджиевна, Бадмаева Вера Баджаевна, Деликова Александра Очировна, Гаряев Николай Яманович, Солонинкина Валентина Михайловна, Очиров Владимир Федорович, Хольджгонова Тамара Басанговна, Шорваев Андрей Лиджиевич цугтаһинь нерәдхд берк, болв цугтан мини сананд.

Эңкр мини багшнрм,
Әмтнә бәәдл җирһлин
байр-бахмҗд багтҗ, сән-сәәхн,
гем-шалтг уга җирһтн гиҗ йөрәҗәнәв.

1975 җил Цаһан-нурин школ төгсәләв, тер цагт директор болҗ үүлдҗ йовснь Санджиев Эренджен Зельмеевич (ода эн үннә һазртан йовна). Мана 34-дгч выпуск гиһәд тәв һар күн биләвидн, багшнрт ода маднас күн болһниг тодлхд маһд, болв тер цагт болсн йовдлмуд һарин тавн хурһн мет мини өмнм тодрхаһар үзгднә.

Ода Хар Һазра районд көдләд, Хальмг Таңһчин Ачта багшин нер зүүснд тана ик тәвц орсмн гиҗ темдгләд, ханлтан тандан өргҗәнәв.

Аристеева М.Н. Сарулын дундын школын
хальмг келнә багш.