Октябрьск района билгтнрин ўўділт

Эн љил Ірісід сойлын љил гиљ зарлгдсмн. Кесг билгтнр эн љилд нерідљ ду-бииєін єарєљ імтні оньг авлна. Хальмг Тањєчд чигн бас сойлын љилд нерідљ район болєнд артистнр билг-эрдмін ўзўлсні хґґн хотл балєснд ирљ сойлын ґдрмўдін давулна. Иим керг-ўўлдврмўдиг хотл балєсна біірн імтн таасљ олар ирљ орлцна. Октябрь сарин 4-д Элст балєсна тањєчин ўўділтин Герт Октябрьск района билгтнр ду-бииєін єарєљ байр ўўдів.

Эн ґдр цуг кґгљмин болн хореографическ композицс сойлын љилд нерідгдв. Октябрьск районд урднь біісн кесг улс ирљ нег єазра ўўрмўдлірн харєљ цаган соньн кевір давулсинь темдглх кергті. Ўўділтин Герин фойед района урчнр эвріннь кегдлмўдін авч ирљ соньн ик єііхўл бўрдів. Сойлын љилд нерідсн керг-ўўлдвриг района тууљин болн района делгрлтд ик тівцін орулсн кўч-кґлсчнрин тускар цокљ авсн видеороликір секв. Байрт орлцсн кесг улс бийін таньљ икір байрлв.

Октябрьск района муниципальн бўрдіцин администрацин єардач Санал Адьяев нег єазра улсан йґріљ, -мана районд билгтнр олн гив, дікід болхла эн туст сойлын кґдлічнр ик кґдлмш кељіні, тедні нилчір ўўдігч коллективс марєаст орлцљ эвріннь нерін туурулна гив. Љил ирвіс района билг-эрдмчнр ґсљ-ґргљљ йовна, район чигн цецгірљіні. Ямаран болв чигн керг-ўўлдврт билг-эрдмін єарєљ артистнр мадниг байрлулна. Иим кевір цааранднь ўўлдљ, района, тер тоод тањєчиннь, нерін туурулљ йовхмн, - гиљ С.Адьяев келв. Темдглхд, эн районд нег ґрк-бўлд кевті хоорнадн тів шаху келн-улсин элчнр бііні. Тегід эдні сойлыг района сойлын кґдлічнр дґњнљ, ду- бииєинь імтнд ўзўлљ таньлдулна. Концертд икір імтнд хамгин икір Санл Шабгуровин, Алексей Далантаевин, Елена Антонован, Динара Манджиеван, Светлана Бухаеван болн Хошуд селіні сойлын билгтнрин ўзўлсн билг-эрдм таасгдв. «Мињєн байр» болн «Шорвин хошуд» гидг бииєин коллективс љил болєн імтиг билг-эрдмірн байрлулна. Альд эс йовв чигн дањгин нўўрт єарч райоєан, тањєчан эдн туурулна. Сойлын љилд нерідсн эн керг-ўўлдврт Хальмг Тањєчин сойлын министрин дарук Николай Санджиев орлцљ Октябрьск района билгтнр йоста артистнр мет билг-эрдмін ўзўлв гив, тегід иргчдін олн зўсн марєаст, фестивальмудт олар орлцх кергті гисн сўв-селвгін ґгв. Удлго районд ўўлдљідг цуг сойлын гермўд компьютерір болн интернетір теткгдхмн гиљ келв. Сойлын љилд нерідсн эн керг-ўўлдвр района сойлын кґдлічнр му бишір ўўлдљіхинь дікн нег герлчлв.

Валентина Корнусова