Валентина Гаряева Хальмгин Геройин нер зўўв

Мана тањєчин нер туурсн дууч хамгин ґґдін ачлврар ачлгдљ, Хальмгин Геройин нер зўўсн йовдл энўні дууна театрин презентацла сііхн ирлцв. Государственн концертн залд дуучин элгн-садн, ўўрмўд, артистнр, олн хілієічнр цуглрсн кемд Тањєчин Толєачин йосна селвгч Василий Бюрчиев Валентина Нимгировнад Алексей Орловин йґрілин бичг умшљ ґгв. Ірісн Федерацин улсин артисткиг дууна театр бўрдієід, келн-улсиннь зґґр болсн олн-імтні дууг делкід кўргљ медўлљ йовсн ач-тусинь тиигљ ґґдін ўнлгдв. Хальмгин Геройин нер зўўлєсні туск Зірлг умшгдсна хґґн заалд альх ташлєн тасрлго, імтн босад зогсад, Валентина Гаряеваг кўндлв.

«Хальмг Тањєчдан ханљанав! – гиљ ик ўўмлєтієір Валентина Нимгировна келв. - Альд йоввчн ик даавртаєар тањєчиннь нериг ґґдін ґргљ йовлав! Энкр мана Тґрскн цецкірљ йовх болтха!» Иим ўўміті, седклин ик ґргмљті йовдлын хґґн концерт цаарандан болв. Эклцднь нерті дууч «Љањєрин» нўр бґлгин тасрхаг бахмљта кевір олнд соњсхљ медўлснь йир чинрті болљ єарв. Зґргті олн баатрмудан эргўлід суулєсн Богд нойн Љањєриг, Бумбин ориг магтсн бахмљта ўгмўд тањєчан улм ик кўцімљсўр уралан дуудсн болљ соњсгдла. Баатрмудан болн билгті улсан цань уга магтљ, кўндлдг кезінк авъясар нутган туурулљах улсиг тиигљ ачллєн йир дигті сін болв. Нег ўлў Сойлын љилд Валентина Гаряевад иим ґґдін нерн зўўлєгдсн ончта болљана.

Валентина Гаряеван дууна театр йоста ўўдігч лабораторь болљ гиљ кўлігдљіні. Бає наста билгтнриг белдлєнд туслсн деерін дууна эрдмиг цааранднь ўўдігч кевір делгрўлх тґр Валентина Нимгировна ґмнін тівв. Дууч болєн нег негніснь йилєрљ дууна туст эврі хіліцті болад, эврієірн тер дууг дуулдгиг кґцх сана нерті дууч зўўљіні. Ґвкнрин заяни билгиг цеврір хадєлхин тґлі нерті дууч кўчн-чидлін холвљана.

Дуучин седвіриг дґњнід эн ґдр Государственн концертн залын тіізд нерті олн дуучнр, ўўдігч коллективс болн артистнр, билгті баєчуд орлцв. Хальмг Тањєчин ачта артист Эдуард Бурлаков, бичкдўдин «Герл», «Тюльпанчик», «Љангр» ансамбльмуд, «Ґґрднр» бииєин театр орцв.

Иигід нерті дууч, хальмгин герой Валентина Гаряеван дууна театр эклід ўўлдљіні.

«Хальмг ўнні» кґдлічнр болн «Хальмг ўнні» умшачнр Валентина Нимгировна Гаряеваг ґґдін ачлврлань йґріљіні.

Љирєл Кермн