Улсин дууч - улсин сана-седклд

Валентина Ильцаранова Хальмгин сойлд , улсин љирєлд бат кевір орсмн. Дуучин санлд нерідсн санлын асхн улсин ўўділтин тањєчин герт болв. Ўдин хґґн дґрвн часла эклх біісн керг-ўўлдврт орлцхар ирсн улсин кесгнь залд орљ чадлго зовад біів. Юњгад гихлі, дурта дуучин санлыг темдглхір тедў дўњгі олн кўн ирв. Залд цуг орм дўўрсн деерін імтн кесг зерглі кеєід таг дўўрід зогсв. Залд орљ чадлго ўлдсн улс фойед цуглрад, театрин єаза Валентина Ильцарановаг санљ, тодлврарн хувалцљ кўўндід кесгтін тарлго біів. Теегин торєа болљ нер туурсн дуучдан імтн цань уга дуртаєинь эн йовдл медўлљіні.

Санлын асхн дуучин ўўдігч ўўлдврин туск видеофильмар эклв. Ик экранд Валентина Ильцаранован зургнь єарч ирхлі імтн цугтан босљ кўндллєін медўлв. Сиврин зовлњгиг дааљ єарад, тґрскін шиніс босхљ авад, билг-эрдмін делгрўлід, сурєуль-эрдмін ґґдлўлід, улсин экономикиг батлљ авсн ўйин улсин итклті элч болљах Валентина Ильцаранован тускар імтн хамдан нег кемд біісін тодлад, дуучин ўўлдвр эн цагин темдг болљ тууљд орсинь зааљ келв. Эн асхн тањєчин сойлын министрин дарук Николай Санджиев, тањєчин кўндті иргн Иван Басангов, тањєчин сойлын ачта кґдліч Клара Сельвина, «Бамб цецг» ансамблин єардач, Ірісін ачта артист Валерий Эрдниев, Ірісін улсин артистк Валентина Гаряева, болн нань чигн улс тодлврин ўг келв. Эдні кеніннь чигн љирєлд нерті дуучла, терўні дуудла залєлдата халхс бііні. Терўгін тодлад, тањєчдан болн олн-імтндін цуг билг-эрдмін ўнн седклісн нерідсн дуучин дўриг эдн сергів. Дуучин дуулсн дуд эзнь ўнні єазрт одсн бийнь дууч маднла хамдан йовхинь, мадндан омг болљ йовхинь медўлв.

Дуучин дуулљ йовсн дуудыг Хальмг Тањєчин улсин артистк Татьяна Чиктеева, Хальмг Тањєчин ачта артистнр Лидия Насунова, Елена Каджиева, Анна Очкаева болн нань чигн билгтнр дуулв. Нерті дуучла хамдан цуг орн-нутгар, єазадын кесг нутгудар хальмг билг-эрдмиг ўзўлљ йовсн «Бамб цецг» ансамблин биичнр чигн цуглрсн улст бииєін нерідв.

«Дуучин нериг сергієід, санлынь тевчід, тґрскн коллективнь – «Бамб цецг» ансамбль иим байрта болн ўўміті керг-ўўлдвр бўрдів, - гиљ Жирєл Анджаевна Тачиева келні. -Дуучин дўр, дуучин дуд оньдин мана седклд. Дікніс теегин торєа мадниг уралан дуудсн болв».

Хальмгин нерті дууч Валентина Ильцаранован санлыг тевчхір ирсн цуг улст кўўкнь Сар-Герл ўнн седклин ханлтан ґргв. Дууч улсин санлд мґњкинд бііхинь эн асхн иткмљтієір медўлв.

Љирєлин Кермн