БУЙНА ҮРНЬ ТАДНД КҮРТТХӘ!

24-05-2020, 15:56 | Таңһчин зәңгс » Бурхн-шаҗна төрәр

"Күндтә ахнр-дүүнр!
Буйнта Үрс сарла Таанриг, әрүн цаһан седкләсн йөрәҗәнәвидн!
Ут наста, удан, бат җирһлтә, цаһан седклән үүскч, эн насндан олн буян хурах болцхатн! - гиҗ цуг хальмгудиг йөрәҗ, Шиңҗәнә мана ахнр-дүүнр менд йовулҗана.

Йосндан эн сар тиим гиҗ, Таанр цугтан сәәхн меднәт. Эшн сарла кесн үүл сай болҗ үрҗдг, тиигәд: "Кесн буйна үнр сальк чигн өрдг" гиҗ бурхн багш зәрлгсн кевәр, эн әрүн Үрс сарла нанд тиим зәңг ирвә. Китд бәәсн Өвр- Моңһлын, Шинҗәңгин, мана "өсрсн цусн, тасрсн махн", "алг махна тасрха, алтн ясна тесркә" гисн ахнр-дүүнр, хальмгуд хальдврта гем харһҗ гиһәд, хальмг улст сана зовад, түрҗәх-зовҗах улст ууҗм хол һазрас сана зовад , "яһҗ дөң-тусан улан залата хальмгудтан күргхм" гиһәд, Әрәсәд, Хальмгт бәәсн хальмгудар, шинҗәнәс нааран нүүҗ ирсн хальмгудар дамҗҗ, тиим улсин нер- усинь медҗ, хайг-тойгинь медҗ, күн болһнд бичкн болвчн, ик хәәрн гиҗ, 2000 арслңгар тер шүүсн өрк-бүл болһнд, тиим кевәр 185 өрк-бүлд, арһ-тусан күргҗ гинә. Деернь болхла 60 000 арслң эмчд, теднд кергтә юминь авч орулхар белн гинә. Бичкн гиҗ, бичә һундтн, тер мөңгн күртсн улсас суртн. Энд-тендәс бичкн-бичкнәр ирхлә, "далад дусал чигн немр" болна. Буйнта күн буйинь үзх, медх, буйн уга күн мууһинь хәәх. Тиигәд эн цецн үгәр "Зөв уга олн цагла буйнта үг өгүл," - үлгүр кеһәд, цуг таанрт эн зәңг күргҗәнәвидн.
Эн буйнта үүл экләд, буй үүскҗ, үлгүр болсн улсин неринь медҗ авий: Байсх, Сумья (Өвр Моңһлын нертә бөк, арһлач), Насун һурвн, зуг һанц эдн һурвн биш, бас нань чигн олн-олн тиим өр-өвч седклтә орлцсн талдан улс бәәнә. Шинҗәнд бас нег тиим үлгүрләд келсн цецн үг бәәдг: " Ач-тусан келхлә ач хәрдг" гидг, зуг эн үг болхла, эврә ач-тус кесән, күүнд медүлсн хөөн тер ач хәрдг, ө-һундл болдг, күүнә ач-тусинь медх кергтә, магтх кергтә, оңдан улст үлгүр болтха гиһәд. "Олна төлә зүтксн күүнә эврә кергинь эврән күцддг", - гиҗ мана өвкнр заксн билә, тиигәд би товчлад эн улсин нернь деер дуудулад, теднә бәәсн һазрин нер медүләд эн зәңг таднд медүлҗәнәв.
Эн буйнта йовдл һанц биш, орчлңд бәәсн олн, көк толвта, мөңк моңһл цаһан седклтә, өргн өөрд зүрктә, халун хальмг седклтә улс, ямаран хол һазра болвчн, альд бәәвв чигн, нань чигн әрүн седклтә улс мана Хальмг Таңһчд бәәсн улст дөң-тусан күргсн бәәнә. Зәрминь бидн медхшвидн, йосн седклтә улс болад, күүнд медүллго туслҗана.
Тиигәд эн Буйинь өргҗ, тиим әрүн седклтә, мана улст ач-тусан күргснднь икл гидг ханлтан өргҗәнәв!!! Буйна үрнь таднд күрттхә! Таднла хамдан байслцму! Эврә элгн-садтаһан, өрк- бүлтәһән, эн буйна үринь эн насндан эдлҗ, амулң-менд җирһцхәтн!

МАНҖИН Намру

БУЙНА ҮРНЬ ТАДНД КҮРТТХӘ!



























#Ўр Сар #Духовность08 #ПраздникиКалмыкии #СиньцзянцыКалмыкам

Видео