Чинртә хүүвин гешүн болв

Әрәсән Президентин медлд бурхн-шаҗна негдлтсиг хамцулҗ зүүцүллһнә хүүв үүлдҗәнә. Ода тер хүүвин ханьд шар шаҗнд шүтдг улсин Әрәсән Оюни төв заллтын ахлач гевш Йонтен шидр орулгдв.
Шар шаҗнд шүтдг улсин Әрәсән Оюни төв заллттыг һардҗадг гевш Йонтенд эннь ик күндтә үүл болҗана. «Президентск хүүвин гешүн болна гисн күндтә болн дааврта керг болҗана, - гиҗ гевш Йонтен ухан-тоолвран медүлв. - Энтн көдлмшин шин девсң болҗана. Олн келн-әмтнә элчнр, олн бурхнд шүтдг әмтн бәәдг мана ик нутгт эннь ик дааврта көдлмш мөн. Күмн әмтнә сә хәәхин төлә залгдсн Бурхн Багшин ном делгрүллһнд эннь туслхмн. Иим күндтә керг даалһснднь Әрәсән Президент Владимир Владимирович Путинд ханлтан өргҗәнәв. Мана орн-нутгт оюни ул-сүүриг батллһар кегдҗәдг үүлдвриг дөңнҗ үүлдхән медүлҗәнәв».
Гевш Йонтена тоолврар, Әрәсәд болн һазадын ордудт шар шаҗ делгрүллһнә халхар кеҗәдг ик көдлмш тиигҗ үнлгдҗәнә. Мана көдлмшт дөң болҗадг цуг әмтнд гевш Йонтен бас ханлтан медүлв. Шаҗна үүлдәчнриг дөңнәд, келн-улс болһна ул-сүүр болдг авъясмуд делгрүллһнд оньган өгчәдг орн-нутгин Президентин һардврт, орн-нутгин Залврт, Орн-нутгин Хүүвд, Әрәсән Федерацин Хүүвд болн Хальмг Таңһчин Толһач Хаска Батуд эн халхин көдлмш делгрүллһнд оньган өгчәхднь гевш Йонтен ханлтан медүлв. Олна палатын болн шаҗна бүрдәцсин шунмһа көдлмшиг чигн гевш Йонтен темдглв. Маднд күцәх олн керг бәәнә. Хамцу үүлдәд, бидн цугинь күцәҗ чадхвидн» - гисн итклтә гевш Йонтен бәәнә.

ҖИРҺЛИН Кермн