«Грэмми» мөрәһәр ачлгдв

Дала Ламин Гегән орлцсн көгҗмин үүдәвр «Грэмми» мөрән марһанд орсна тускар урднь бичсн биләвидн. Мана Оюни Багш күндтә эн мөрәһәр ачлгдсна туск байрта зәңг ода ирв.

Бурхн Багшин номд шүтдг саяд улсин Оюни ик Багш, XIV Дала Ламин Гегән Тензин Гьяцо «Грэмми» мөрә авсмн. Аудио дегтриг хамгин сәәнәр олнд медүлҗ умшсн төләдән Дала Ламин Гегән тиим өөдән мөрәһәр темдглгдсмн. Ямаран байрта йовдл гинәт!
Өдгә цага делкәд күн болһна дааврнь өсчәхиг, өр-өвч седкл ик чинр зүүҗәхиг эн йовдл медүлҗәнә. Эвин бәәдлд ни-төвкнүн бәәлһн цуг улсин керг болҗана. Амулң җирһлин төлә кен-негнь даавран медҗ үүлдхлә, цугтад туста болхмн. Тасрхан уга сольгдад бәәдг делкәд нег-негнәннь седкл медҗ, әмтн хоорндан ни бәәлһнә төр чинртә болҗана.
Дала Ламин үүдәвриг олн улс, хамгин түрүнд көгҗмчнр болн эн туст гүн медрлтә үүлдәчнр өөдәнәр үнлв.
Давсн җилин үкр сард Дала Ламин Гегәнә дегтрнь «Грэмми» мөрән марһанд орсна тускар бичәд, мөрән ашнь диглгдхинь оньган өгч күләҗәләвидн.
Лу сарин 1 шинд көгҗмчнр дунд күндтә «Грэмми» мөрән аш байрин бәәдлд йилһгдсмн. Дала Ламин Гегәнә дегтртнь энүнә ухан-тоолвр орсмн. Өдгә цага нәрн бәәдлд ни-төвкнүн бәәдл ямаран ик чинртә болҗахин туск, күн болһна хөв-кишг цуг улсин амулң бәәдллә залһлдата болдгин тускар, кен-негндән му келго, ни-эвәр, өр-өвч седкләр бәәлһнә туск Ик Багшин тоолвринь дахулҗ, энткгин көгҗмин зевсгин айсмуд орулгдснь соньн болв.
«Грэмми» мөрә авсндан Дала Ламин Гегән онц бийиннь күцәмҗ гиҗ тоолҗахш. Бурхн Багшин шаҗна номиг олн улс дунд тархах йовдл гиҗ Мана Ик Багш эврә тоолвран медүлв. Күмн әмтнд әдлднь туста ухан-тоолвриг медүлхд, өөр эргндк йиртмҗин туст килмҗән һарһхин туск, нарта орчлңд бәәдг цуг әмтн ни-негн бәәхин туск ухан-тоолвран медүлхд эн мөрә туслснднь «Грэммин» бүрдәһәчнрт Дала Ламин Гегән ханлтан медүлв.
Хальмгин хувргуд, шаҗна үүлдәчнр болн таңһчин цуг әмтн Дала Ламин Гегәнә үүдәвриг тиигҗ өөдән үнлгдсинь ик байртаһар тосв. Иигәд саяд улсин Оюни Багшин ухан-тоолвр ода делкәд темдгтә мөрән дөңгәр нег үлү улм делгрлҗ, олн улсин җирһлд урмд өгхнь лавта.