Бичкдүдт күцәмҗ дурдв

Шин сурһулин җилин өмн өргнд «Энергосервис» акционерн ниицәнд түрүн болҗ сурһульд орх бичкдүдиг йөрәдг авъяс бәәнә. Эн бүрдәцд көдлҗәх һаңначнрин, слесарьмудын, диспетчермудын, җолачнрин, экономистнрин болн нань талдан көдләчнрин өрк-бүлд үрнь 1-ч класст орҗахнь хамдан көдлҗәх үүрмүдин төлә байрта болн темдгтә йовдл болна. Бичкдүд эк-эцкнриннь көдлмшт ирҗ, хоорндан таньлдна. Сурһулин җилин өмн бүрдәцин көдләчнр эднә төлә байрин керг-үүлдвр бүрдәнә. Сән авъяст тохрсар эднә төлә нәр-наад бүрдәҗ, шикр-балтаһар тоона, белгүд бәрүлҗ өгнә. Болв эн җил пандемий учрнас иштә ик байр бүрдәгдсн уга, санитарн некврлә ирлцҗ харһлт бүрдәгдв.
Шидр «Энергосервис» акционерн ниицәнә генеральн һардачин үүл дааҗадг Тактинә Батля эн җил сурһульчнр болх бичкдүдиг йөрәв. Эн җил бүрдәцин көдләчнрин 12 күүкн-көвүн сурһульд орхмн. Харһлтд орлцсн бичкдүд түрүләд эмәҗәсн билә, болв эк-эцкнрнь эднд көдлҗәх орман үзүләд, үүрмүдләһән таньлдулсна хөөн эдн дарунь иҗлдв.
Бүрдәцин һардач бичкдүдт йөрәлин бичг болн сурһульднь керглгдх тоот белглв. Пандемий учрад урдкла әдл ик байр бүрдәҗ болшго болв, тер бийнь түрүн болҗ сурһульд орҗах бичкдүдиг эн чинртә болн ончта йовдлла эрк биш йөрәх кергтә гиҗ бидн тоолҗанавидн. Эдн өсәд-босхларн эн харһлтыг тодлх гиҗ Тактинә Батля келв.
Бичкдүд сурһулин җил эклхиг күләҗәхән келҗ, түрүн багштаһан таньлдҗ сурһуль сурх класст одснаннь тускар хувалцв. Эк-эцкнрнь эднд хувц-хунр, канцелярск эд-тавр хулдҗ авсна тускар эдн бас келв. Мутаевихнә өрк-бүлд икр күүкд Баира болн Айсана сурһульчнр болхмн. Күүкдин эцкнь Санҗ Тюрбяевич эн бүрдәцд бүртклһнә кергслин слесарь болҗ көдлнә. Икр күүкднь Элст балһсна 10-ч тойгта дундын сурһульд сурхмн. Эдн хамдан сурх үүрмүдтәһән болн багштаһан харһхан теңкән уга күләҗәнә. Эк-эцкнь хойр күүкндән цуг кергтә тоотынь хулдҗ авв, эдн сурһулян сәәнәр сурх гиҗ эдн ицҗәнә.
«Тадн сурһулян ямаран темдгүдтәһәр сурхд?» – гиҗ күүкд-көвүдәс сурхла, харһлтд орлцсн Бадмин Рома цугтаһаснь түрүлҗ: «Зуг 5 гидг темдгәр», – гиҗ хәрү өгв. Тактинә Батля бичкдүдиг дәкәд нег йөрәһәд, сурһулян сәәнәр сурч, эк-эцкнртән өлзәтә сән үрд болтн гиҗ дурдв. «Арвн негн җил давад, энд дәкәд иигҗ цуглрхмн», – гиҗ һардач келсиг цуһар дөңнв. Келхд, «Энергосервис» бүрдәцд сурһулян төгсәсн күүкд-көвүдлә иим харһлт бүрдәлһн бас сән авъяст тохрсмн.

ДООҖАН Наталья
ЗУРГТ: «Энергосервис» акционерн ниицәнә генеральн һардачин үүл дааҗадг Тактинә Батля икр Муутан Баираг болн Айсанаг йөрәҗәх кем