Гемтә улст түргн дөң күргхин төлә

07-09-2020, 14:01 | Таңһчин зәңгс » Хальмг Тањєчин Толєачин ґдр-бўр

Шидр Хальмг Таңһчин Толһач Хаска Батун һардврт коронавирус гемәс хөрлһнә бачм бәәдлин штабин сүүр болв. Терүнд таңһчин премьер-министр Юрий Зайцев, таңһчин йосна органмудын болн муниципальн бүрдәцсин һардачнр, зөв-йос харлһна органмудын элчнр орлцв. Эрүл-менд харлһна халхин төрмүд сүүрин һол төр болв.
Сүл цагт коронавирус гемәр гемтсн әмтнә то икдҗәхәс иштә терүг илдкҗ авлһна, гемтә улст түргн дөң күрглһнә, әмтиг соньмсулҗах төрмүдәр цәәлһвр өглһнә болн гемтә улсиг дарунь эмнлһнд оруллһна төрмүд эн сүүрт хәләгдв. Тиигәд, шинҗллт кедг лабораторьмудын үүлдвриг шунмһадуллһна төр чинртә болҗана. Эн хальдврта гемиг цаглань илдкҗ авхин төлә Әәдрхн балһснд бәәдг лабораторьла бооца батлҗ, тиигәрән шиҗллтсиг йовуллһна туст үгцән батлгдсн бәәнә. Тер мет мана таңһчд ода үүлдҗәдг лабораторьсин күчиг икдүллһнә туст керг-үүлдврмүд батлгдсн бәәнә. Давсн сард цус гүүлгдг төвд немр лабораторь секгдсн билә, болв тер бийнь әмтн удан цагтан шинҗллтин ашлвриг күләнә. Тегәд эн туст көдлмшән шунмһадуллһна туст таңһчин эрүл-менд харлһна министерствд даалһвр өггдв. Гемтә улст компьютерн шинҗллт келһнә туст бас нәрн бәәдл тогтсн бәәнә. Тегәд эн бәәдлиг ясрулхин төлә садв гемәс хөрлһнә таңһчин диспансерт немр КТ-шинҗллт кехмн гиҗ шиидгдв.
Тер мет түргн дөң күрглһнә шишлң көлгн-күчнә то икдүллһнә тускар бас күүндвр болв. Дәкәд гемтсн улс эмчд бийән үзүлхин төлә удан цагтан чеерүдт сууҗ, дарунь шинҗллт кеҗ чадлго зовлң эдлҗәнә. Иим бәәдл учршгон төлә гемтә улст дарунь шинҗллт кеҗ, эмнлһнд орулх кергтә гиҗ сүүрт орлцачнр келв. Таңһчин эрүл-менд харлһна министерствин зәңглсәр, балһсна поликлиникд 12 бригад үүлдҗәнә, теднәснь 4-нь COVID-19 гемтә улст гер деернь дөң күргхин төлә, дәкәд 4 бригад гер деер әмтнд шинҗллт кехин төлә йилһгдв. «Түргн медицинск дөң күрглһнә болн аюлын медицинә төв» гидг таңһчин эмнлһнд немр бригадмуд тогтагдсн бәәнә.
Балһсна поликлиникд шишлң телефона хайгар әмтн соньмсулҗах төрәр цәәлһвр авхин төлә сән таал тогталһна төр бас сүүрт босхгдв. Тиигәд, балһсна поликлиникд бачм медицинск дөң күрглһнә төлә 8 961 549 9343 гидг немр тойг немгдв. Коронавирус гемин тускар үүмүлҗәх төрәр цәәлһвр өглһнә олн канальн телефо хулдҗ авх кергтә гиҗ сүүрт шиидгдв.
- Эрүл-менд харлһна көдләчнр, эмнлһнә бүрдәцсин һардачнр эн хальдврта гемин туст бәәдлиг чаңһ кевәр бүрткҗ, ямр нег төр учрхиг урдаснь шинҗлҗ, дарунь чик шиидвр авч үүлдх зөвтә. Эн туст әмтнә ухан-тоолвриг учртан авх кергтә, тер тоод социальн сетьд барлгддг сүв-селвгүдиг бас олзлҗ болхмн. Удл уга грипп болн ОРВИ гемәр әмтн гемндг кем эклх, тегәд эртәснь терүнәс тәрлһнә керг-үүлдврмүд күцәх кергтә. Тер мет хамцу комиссьмүд бүртклһнә керг-үүлдврмүдиг цааранднь давулҗ, санитарн некврмүдиг күцәдго һардачнриг болн арһлачнриг шоодврла харһулх кергтә. Зуг цуһар эн гем әәмшгтә болҗахиг медәд, саглуллһна керг-үүлдврмүд күцәдг болхла, чирәдән хааһул өмсдгиг дасхла, тер цагт бидн бәәдлиг ясрулҗ чадхвидн, – гиҗ Бату Сергеевич келв.

ДАВАН Наталья

Видео