Тәрә-темс урһахин төлә

14-09-2020, 15:51 | Таңһчин зәңгс » Хальмг Тањєчин Толєачин ґдр-бўр

Давсн амрлһна өдрмүдт Хальмг Таңһчин Толһач Хаска Бату Октябрьск районд көдлмшин кергәр одад ирв. Района муниципальн бүрдәцин толһачин үүл дааҗадг Увшан Басңла эдн зәрм объектс шинҗлҗ хәләв.
Таңһчин толһачин келсәр, «Широкий» гидг усна тогталын үүлдвриг ясрулхин төлә эн объектыг таңһчин социальн-экономическ делгрлтин онц көтлврт орулв. Ода деерән эн объектын төсвин-һаруһин бәрмт цаас белдлһнә көдлмш күцәгдҗәнә. Эн системиг ясруллһна көдлмшин ашт Ик Царң болн өөр шидр бәәдг селәдиг сән чинртә уудг усар тетклһнә төр хаһлгдхмн.
«Балһснд сән кец-таал тогталһн» гидг келн-улсин төсвин медлд Ик Царң селәнд бичкдүдин төлә нааддг талвң тосхлһна көдлмш төгсхдән өөрдҗ йовна. Үкр сард эн эдлврт орулгдх зөвтә. Хаска Бату тосхгдҗах объектыг хәләснә хөөн зәрм дуту-дундс илдкҗ, эн төсв әмтнд сән кец-таал тогталһна төлә күцәгдҗәхиг темдглв. «Райодар йовсн цагтан тосхгдҗах талвңгудт әдл дуту-дундс учрдгиг үзнәв. Харм төрхд, тосхлтын көдлмшиг чинртәһәр эс күцәдг йовдлмуд илдкгднә. Болв эн объектс әмтнә төлә кегдҗәхиг мартхмн биш. Эндр олн зүсн төсвс, өдгә цага материалмуд болн кергсл бәәнә, тегәд көдлмшиг өөдән чинртәһәр кеҗ болҗана. Эн туст седвәртәһәр үүлдх кергтә», – гиҗ Бату Сергеевич селвглв.
Октябрьск район мана таңһчд тутрһ урһадг район болна, тегәд Хаска Бату эдл-ахусиг усар тетклһнә төр босхв. Эн чинртә төр хаһллһнд федеральн төв маднд дөңгән күргхдән белн гиҗ таңһчин толһач темдглв. Болв бидн тутрһ урһалһна болн тәрә тәрлһнә халхар олзта-орутаһар болн үнн кевәр үүлдх зөвтәвидн. Сарпан усар тетклһнә системин Р-1 цувгар усар тетклһнә төриг хаһлх кергтә, юңгад гихлә Шорв һолын иргчин тускар бас ухалх кергтә. 1987 җилд тосхгдсн «КАРОС-2» гидг ус сордг станц эндр чигн Әрәсән Өмн үзгт хамгин ик болна, тегәд чигн районд тутрһ, тәрә-темс урһадг бәәсмн. Харм төрхд, сүл 16 җилин эргцд эн станц үүлдҗәхш, эннь ар үзгт бәәдг райодын экономикд бас харшлтан күргв. Эн станцин үүлдвриг дәкнәс бүтәх арһ хәәх кергтә гиҗ таңһчин толһач района һардврт неквр тәвв. Болв хамгин түрүнд экономическ, социальн болн политическ халхин төрмүдиг шинҗлх кергтә гиҗ Хаска Бату темдглв. Тер мет таңһчин толһач районд хату девскртә хаалһс яслһна болн тосхлһна төрмүдлн тускар бас күүндв.

ДООҖАН Наталья

Видео