«Нарнд» бичкдүдт дулан болтха!

15-09-2020, 16:04 | Таңһчин зәңгс » Хальмг Тањєчин Толєачин ґдр-бўр

Урҗ өдр Элст балһсна 6-ч микрорайонд «Нарн» гидг бичкдүдин садт немр бәәр эдлврт оруллһнд нерәдгдсн керг-үүлдвр болв. Хальмг Таңһчин Толһач Хаска Бату болн Элст балһсна һардврин толһач Дмитрий Трапезников байрин керг-үүлдврт орлцҗ, бичкдүдин садын көдләчнриг йөрәв. Күндтә гиичнр улан тасм керчҗ, шин бүүриг йөрәв. Немр бәәрн «Демографь» гидг келн-улсин төсвәр тосхгдв. Эн кергт 20 сай арслң йилһгдсмн.
Энд хойр багд орх бичкдүдин төлә 40 немр орм бүрдәгдв, ке-сәәхн өлг-эд хулдҗ авгдв, күүкд һаза наадхин төлә шишлң талвң бәәнә, сег тосхгдв. Бичкдүдт әәмшг уга бәәдл теткхин төлә шишлң девскр делгәтә. Темдглхәс, эн бүрдәцд нүднә харань муурсн бичкдүд орна, эднә төлә энд сән таал тогтагдсн бәәнә, күүкд-көвүдин эрүл-менд батруллһнд кергтә аппаратур олзлгдна. Бичкдүдин садын һардач Молоткан Анна күндтә гиичнрт шин бәәриг үзүлҗ, бичкдүд унтх, наадх болн эднд хот болһх хорас үзүлв. Таңһчин Толһач Хаска Бату тосхачнр көдлмшән өөдән кемҗәнд күцәсиг темдгләд, балһсна һардвр, бичкдүдин садын сурһмҗлачнр болн тосхачнр хамцу үүлдҗ цугинь дигтә-тагтаһар кехәр шунсиг өөдәнәр үнлв.
- Эпидемиологическ бәәдләс иштә эндр бичкдүд угаһар бидн эн байрин керг-үүлдвриг давулҗанавидн. Эн объект тосхсн улс седклән тәвҗ көдлмшән даавртаһар күцәснь ил үзгднә. Тосхгдсн шин бәәр бат болн ке-сәәхн, углҗ тәвгдсн өлг-эд бас йир эвтәкн болн бичкдүдт таалта. Көдлмшән цааранднь чигн тиим кевәр күцәх кергтә. Энд көдлҗәх сурһмҗлачнр байрта бәәнә, эдниг медҗ болхмн. Эднә болн бичкдүдин төлә өдгә цага сән таал тогтагдснь ик байр-бахмҗ үүдәҗәнә. Шин бүүртн өлзәтә болтха, – гиҗ Бату Сергеевич келв.
Немр бәәрн өдгә цага некврлә ирлцҗ тосхгдв гиҗ темдглх кергтә. Энд видеокергсл углҗ тәвгдсн бәәнә, һаң халунд аһарин кемҗә диглдг прибормуд бәәнә. Хот болһдг хорад өдгә цага технологическ кергсл бәәнә, эн санитарн-гигиеническ некврмүдлә ирлцнә. Тосхлтын көдлмш нидн бар сарин 13-д эклсн билә. Батлгдсн зураһар эн объектыг эн җилин чилгчәр бар сард эдлврт орулх зөвтә бәәсмн. Болв тосхачнр көдлмшән зуралгдсн цаг-болзгас һурвн сар урд төгсәв. Элст балһсна толһач Дмитрий Трапезниковин темдглсәр, объектыг эртәснь эдлврт орулснас иштә дәкәд немр 200 орм бүрдәлһнә төлә федеральн шаңһәс мөңг йилһх чигн. Тегәд ода балһсна һардвр төсвин-һаруһин бәрмт цаасд белдәд, эрлһән орулсн бәәнә, эн җил талдан бичкдүдин садмудт бас немр бәәр тосхлһна көдлмш эклхмн гиҗ зуралгдҗана.
Элстин 155-ч җилин өөн угтҗ эн долан хонгт балһсна 5-ч болн 14-ч тойгудта бичкдүдин садмудт бас немр бәәр эдлврт оруллһна байрин керг-үүлдврмүд болхмн. Хотл балһсна өөнин өдрлә дорас өсч йовх бичкдүдт иим сән белг белглҗәхнь хойр дам байрта йовдл болҗана.
Келхд, Хальмг Таңһчин Толһач Хаска Бату байрин керг-үүлдврт орлцхар велосипедар ирв. Намр ирсн бийнь нарта чилгр өдрмүд зогсҗана, тегәд цогц-махмудан батрулҗ чик авг-бәрцәр бәәх кергтә гиҗ Бату Сергеевич келв.
- Ода деерән мана балһснд велосипедистнрин төлә сән таал уга, тегәд хаалһд эднә төлә шишлң орм йилһҗ өглһнә төр хаһлхвидн. Кемр велосипедар йовдг улсин то икдәд бәәхлә, тер цагт җолачнр тедниг оньгтан авч, хаалһд зә өгәд бәәхмн,- гиҗ толһач келв.

ДООҖАН Наталья

«Нарнд» бичкдүдт дулан болтха!
«Нарнд» бичкдүдт дулан болтха!

Видео