Чик авг-бәрц батрулҗ

16-09-2020, 15:12 | Таңһчин зәңгс » Хальмг Тањєчин Толєачин ґдр-бўр

Шидр Хальмг Таңһчин Толһач Хаска Бату Элст балһснд бичкдүдин садт немр бәәр секлһнә байрин керг-үүлдврт велосипедәр ирснә тускар бидн бичләвидн. Бату Сергеевич бичкнәсн авн чик авг-бәрцәр бәәҗ, спортар соньмсҗ йовна, тегәд чигн эн велосипедар эс гиж мотоцикләр зәрмдән ямр нег керг-үүлдврт орлцдгнь сән авъяст тохрв. Ода деерән мана хотл балһснд велосипедистнрин төлә сән таал тогтагдад уга, болв өөрхн иргчд эн төр эрк биш хаһлгдх гиҗ Бату Сергеевич темдглв.
Эн җил мана бәәдл-җирһлд урднь үзгдәд уга хальдврта гем учрад, күн болһнд харшлтан күргв. Хотл балһснд зәрм әмтн пандемий учрснас авн велоспедар йовдг болв. Олна көлгәр йовхд әәмшгтә болҗахас иштә кесгнь велосипедар йовснь деер гиҗ тоолна. Дәкәд эн көлгәр йовснь күүнә эрүл-мендд туста болна. Удан цагтан көдлмштән суудг улст цогц-махмудан батрулҗ эрүл-менд бәәхин төлә велосипедар йовх кергтә гиҗ эмчнр селвг өгнә. Хәрнь, мана хотл балһснд сүл цагт эн көлгәр йовҗ, цаган тустаһар давулхдан дурта улсин тонь икдәд йовна. Зәрмснь өрк-бүләрн асхнднь балһсна уульнцсар болн «Иньгллт» паркд велосипедар йовдгиг үзҗ болхмн.
Мана орн-нутгт 2014-ч җиләс авн «Көдлмштән-велосипедәр» гидг керг-үүлдвр җилд хойр дәкҗ, хөн болн һаха сармудт, давулгдна. Удл уга, һаха сарин 22-ла, эн керг-үүлдвр эн җил хойрдад болхмн, тегәд терүнд мана таңһчин әмтн шунмһаһар орлцх гисн нәәлвр бәәнә. Тиигәд нидн мана орн-нутгт 400 компаня көдләчнр, эннь ут тоодан нег сай күн, көдлмштән велосипедәр күрв. Мана таңһчд эн керг-үүлдвр өргәр делгрәд уга, болв терүг дөңндг бүрдәцс бәәнә. Таңһчин комплексн теткврин төвмүдин көдләчнр эн кергт шунмһаһар орлцна. Келхд, Приютн болн Баһ Дөрвд селәдт бәәрн әмтн велосипедар кергәрн йовдгинь үзҗ болхмн. Эн селәдт ик-бичкн уга велосипедар йовхдан дурта.
Давсн амрлһна өдрмүдт суңһврин Негдсн Өдрин йовудт Элст балһсна улс олна һазрт сән таал тогталһна объектыг шүүҗ авв. «Балһснд сән кец-таал тогталһн» гидг келн-улсин төсвәр күцәгдҗәх керг-үүлдврмүдин йовудт хотл балһсна 7-ч микрорайонд скейтпарк тосххиг әмтн олар дөңнв. Тегәд ирх җилд тенд цаган тустаһар болн сергмҗтәһәр давулхин төлә сән таал тогтагдхмн. Тенд велосипедар йовдг улст бас шишлң хаалһ тосхгдхнь лавта.

ДООҖАН Наталья

Видео