Бүртклһнә керг-үүлдврмүд

06-11-2020, 16:22 | Таңһчин зәңгс » Эрўл-менд харлһн

Әрәсән Роспотребнадзорин һардачин тогтаврас иштә мана орн-нутгт хальдврта гемәс саглуллһна санитарн-эпидемиологическ некврмүд батлгдсн бәәнә. Олн әмтн цуглрдг һазрт, хулд-гүүлгәнә объектст болн олна көлгнд цуһар чирәдән медицинск хааһул эрк биш өмсх зөвтә болҗана. Мана таңһчд ведомствс хоорндк көдлмшч багмуд санитарн некврмүд күцәлһнә туст дару-дарунь бүртклһнә керг-үүлдврмүд давулна. Тиигәд, шидр хотл балһсна 4-ч микрорайонд бәәдг хулд-гүүлгәнә 10 объектд болсн бүртклһнә керг-үүлдврмүдин ашт зәрм дуту-дундс илдкгдв. Арһлачнр болн хулд кехәр ирсн улс санитарн некврмүд күцәнә гиҗ көдлмшч багин гешүд темдглв.
Таңһчин эрүл-менд харлһна министерствин то-дигәр пандемий эклснәс авн 9748 күн гемтв. Сүл хонгт дәкәд 92 күн эн хальдврта гемәр гемтснь илдкгдв. Хәрнь, 6762 күн эн гемәс эдгв, тер тоод сүл хонгт 107 күн эдгснә тускар министерств зәңглв. Һундл төрхд, эн гемәс көлтә әмнәсн хаһцсн улсин то 110 болв. Таңһчин госпитальмудт 753 күн эмнлһн авчана. Күнд кевәр гемнь давҗах 19 күүнәс 11-нь ИВЛ-аппаратар кииһән авчана. Гемтә улс дунд 8 саата күүкд күн бәәнә, эдн 1-ч тойгта госпитальд эмчнрин хәләврт эмнлһ авчана. Таңһчин эмнлһнә улд үүлдҗәдг 3-ч тойгта госпитальд эмнлһнд бәәх 335 күүнәс 48-нь Деед Яшкулин интернатд секгдсн госпитальд цааранднь эмнлһ авлһнд йовулгдв. Яшкулин района госпитальд немр орм тогтагдсна хөөн 93 күн эмнлһнд ода бәәнә. Көтчнрә болн Хар Һазра райодын эмнлһст 38 күүнд эмчнр дөң болҗана.
Әрәсән правительствин шиидврәр регионмудт 1 җува арслңга дем күрггдхмн. Эн мөңгәр лабораторьмудын төлә кергтә кергсл хулдҗ авгдх зөвтә. Әрәсәд пандемий эклснәс авн ут тоодан 61,5 сай шинҗллт кегдв. Роспотребнадзорин некврәс иштә коронавирус гем илдкҗ авлһна шинҗллтсин то икдх зөвтә болҗана. Тегәд шин кергсл углҗ тәвлһн болн немр лабораторьмуд секлһн эн кергт туслхмн гиҗ күләгдҗәнә.

БАТАН Наталья

Видео