Тәвн җилдән - нег ормдан

Сегодня, 12:34 | Общество, Таңһчин зәңгс, Зіњг, Эрўл-менд харлһн

Тәвн җил хооран Сарпуль балһснд ик сурһуль төгсәһәд, баахн эмч Мануна Татьяна Городовиковск района Виноградное селәнд күч-көлснә хаалһан эклсн болдг. Селәнә эмнлһнд бәәрн улст килмҗән тусхаһад, ик-бичкн угад дөңгән күргҗ үнн-чик седклтәһәр көдләд, энд дамшлт хоршасмн. Тер цагт селәнә эмнлһнә бүрдәцд әмтн эмнлһ авад, шинҗллт кеһәд, дор ормдан цуг халхин дөң авдг бәәсмн. Хойр җил давад, баахн эмч Элст балһсна түргн дөң күрглһнә цергллтд көдлхәр шиидв. Тиигәд 1978 җиләс авн эндр өдр күртл Татьяна Ильинична энд көдлҗ йовна.
Нааран ирхднь түргн дөң күрглһнә цергллтиг Навгинова Клавдия Эрдниновна һардҗасн билә. Ах эмч баахн мергҗлтиг бүләнәр тосад, ямр нег төр учрхлань сүв-селвгән өгәд, дамшлтарн хувалцҗ дөң-нөкд болв. Ах үүрмүдиннь килмҗтә һардврт баахн эмч дарунь иҗлдәд, энд үлдв. Түргн дөң күрглһнә цергллтин көдлмш ик дааврта, амр биш, өдр болһн гилтә олн-әмтнлә харһҗ, дарунь дөң күргх кергтә, тегәд зәрмнь энд удан көдлҗ чадхш. Мануна Татьянад болхла эн көдлмш соньн болҗ медгдв, тегәд эн дамшлтта үүрмүднь заасн хамг тоот тодлҗ, әмтнд цаһан седклән болн килмҗән тусхаҗ, гемтсн улст дөң күргдг багин эмч болҗ көдлв. Эндр болхла Татьяна Ильинична түргн дөң күрглһнә цергллтин эмчнрин көдлмш чадмгар һардна.
Тәвн шаху җилдән тааста эрдмәрн көдлҗәдг Мануна Татьянаг хотл балһснд олн-әмтн меднә, тевчҗ күндлнә. Эн җилмүдин эргцд эн эмч кедү күүнә әм аврсн болх гинәт! Хуучта, дару-дарунь эмчнриг бий талан дууддг улс Татьяна Ильиничнаг сәәнәр меднә, мел эн ирхинь даңгин сурна. Шулун-шудрмг, бат цогц-махмудта күүкд күн олн давхрт баһчудас түрүлҗ давшдгнь үүрмүдтнь өврмҗ болна.
- Мана ах үр цаһан седклтә, ик санан уга, тевчңгү, үүрсг, үгтә-күүртә, кезә чигн кен-негнднь зовад, бүлән үгәрн урмдулдг күн мөн. Татьяна Ильинична баһ наста көдләчнрт нүдн-амн болад, дамшлтарн хувалцна, сүв-селвгән өгәд, эс медгдсинь зааҗ өгхәр шунна. Тер төләд баһчуд энүнлә нег багд көдлхәр седнә. Тәвн шаху җилдән нег ормд көдлҗәдг төләдән эн кесгинь таньҗ-меднә. Әәмшгтә гем түгҗәсн кемд мана ах үр завср угаһар көдләд, кесг күүнә әм аврсмн. Байн дамшлтта, өөдән мергҗлттә эмч маднд үлгүр-үзмҗ болна, - гиҗ үүрмүднь бахтна.
Мануна Татьянан келсәр, түргн дөң күрглһнә цергллтд көдлхд амр биш, тер төләд цуһар ниитәһәр кергән даавртаһар күцәх зөвтә. Эмч болну, җолач, фельдшер болну цуһар нег-негән дөңнәд, түшг болхла, көдлмш сән йовудта болна. Тәвн һар җил хооран эмчин эрдм шүүҗ авсн Мануна Татьяна үнн-чик седклтәһәр көдлҗәдг төләдән Әрәсән болн Хальмг Таңһчин ачта эмчин өөдән нер зүүҗәнә. Хамдан көдлҗәдг үүрмүднь эрдмдән итклтә Татьяна Ильиничнаг йөрәһәд, ач-тусинь хәрүлҗ, бүлән үгән нерәдснь зүркнь хәәлүлҗ байр үүдәнә.

ДООҖАН Наталья

Видео