Ик мөргүл урмдта болв

Сегодня, 14:41 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Бурхн Багшин Гегән 33 бурхдын таралңгин орнас бууҗ ирсн әрүн йовдлд нерәдсн байрин өдр Хальмгт темдглгдв. Эн җил шаҗна байр үкр сарин 1-лә ирлцв. Таңһчин әмтн цаһан седклтәһәр кергүдән тодлад, өр-өвч үүлдврән улм делгрүлҗ, цуг әмтн эвин таалд амулң-менд бәәхин төлә зальврв.
Бурхн Багшин Алтн сүмд шаҗна әрүн эн үүлдврт нерәдсн байрин мөргүл болв. Таңһчин әмтнлә хамдан эн мөргүлд Хальмг Таңһчин Толһач Хаска Бату бас орлцв. Мөргүл эклхин өмн таңһчин Толһач Хальмгин Шаҗн Ламла болн Тыван Камбы Ламла хурлыг эргҗ йовв. Бурхн-шаҗна һурвн эрдньд нерәдҗ тосхгдсн мандлд мөргәд, таңһчин Толһач зальврв. Хурлд цуглрсн улст йөрәлән нерәдхләрн, Бату Сергеевич оюни негдлт ямаран ик чинр зүүҗәхинь темдгләд, әмтиг хамцулгч, залһлдаг батлгч күчинь заав. Хальмгин Шаҗн Лам гевш Тензин Чойдак келсн үгдән Бурхн Багшин үлгүр җирһл заясн эк-эцкнртән, өөр-шидр бәәдг улстан ханлтан өрглһн ямаран ик чинртә болдгинь медүлнә. Уңг-тохман, төрскн һазран мартлго бәәдгин үлгүр энтн болҗана.
Бурхн-шаҗнд шүтдг әмтн темдглдг байрин тууҗиг тодлхмн. Гегәрлтин хаалһд орчкад, Бурхн Багш теңгрүр залрҗ һарсмн. Тенд таралңгин орнд экнь хаана хатн Махамайя бәәсмн. Ут һурвн сарин туршарт көвүнь экдән бурхн-шаҗна номан цәәлһҗ өгсмн. Экдән цань уга эңкр болҗахан Бурхн Багш тиигҗ медүлсн болдг. Хәрҗ ирҗ, бурхн-шаҗна номиг маднд цәәлһтн, - гиҗ һазр деер үлдсн әмтн Бурхн Багшан сурсмн. Тиигәд әмтнә сурврар Бурхн Багш һазрт бууҗ ирәд, олн-әмтндән номин цәәлһвр өгдг болсмн. Зурһан зүүл цуг әмтнә тускар, цуг әмтә тоотын тускар Мана Ик Багш даңгин ухалдг бәәсинь тернь медүлҗәнә.
Байрин мөргүлд Тыван Камбы Лам Лоден Шераб толһалҗ ирсн делегац орлцснь нег үлү ончта болв. Ах-дү келн-улс өвкнрин авъясмудан хадһлҗ, иргч үйнрин оюни сурһмҗд тернь туслдгиг герчлҗәнә.
Бурхн Багшин алдр үлгүриг үзүлҗ, әмтнд урмд өгсн мөргүл цуг улсин седклд мартгдлго тодлгдх. Ом Муни Муни Маха Муние Соха!

Видео