Хальмгин делгрлтин тускар күүндв

11-12-2020, 17:41 | Политика

Зулын байрин өмн өргнд Хальмг Таңһчин Толһач Хаска Бату Әрәсән правительствин Ахлачин дарук Марат Хуснуллинла харһв. Селвлцәнд таңһчин делгрлтин төрмүд хәләгдв. Тиигәд, «Әәмшг уга болн сән чинртә хаалһс», « Гер-бүүр болн балһсна сән кец-таал» гидг келн-улсин төсвсин болн «Цевр усн» гидг федеральн көтлврин тускар эдн күүндв.
- Харһлтд хәләгдсн төрмүдәр шиидвр авгдв. Тиигәд гер-бүүр болн хаалһс тосхлһна, «Цевр усн» гидг көтлврәр немр мөңг йилһҗ өглһнә, Ик Буурла усна сурвлҗна объектд бүртклһнә керг-үүлдвр күцәҗ терүг олзллһна туст шиидвр авлһна төрмүд босхгдв. Элст балһсна 2-ч микрорайонд 15-ч тойгта герт газ хаһрсна ашт патьрмуднь эвдрсн улсиг гербүүрәр тетклһнә төрәр бас күүндвидн,– гиҗ Бату Сергеевич келв.Мана таңһчар давҗадг федеральн чинртә хаалһсиг 2023-ч җил күртл икдүллһнә, терүгәр дөрвн көлгн-күчн зерглҗ йовлһна төлә сән таал тогтагдхмн гиҗ харһлтд шиидгдв. Эннь хаалһд әәмшг уга бәәдл тогталһнд туслхмн. Тер мет тосхлтын халх делгрүллһнә төр бас босхгдв. Тиигәд, тосхлтын объектсиг электрическ сетьмүдт оруллһна төр бас хәләгдв. «Гер-бүүр болн балһсна сән кец-таал» гидг келн-улсин төсвин халхар мана таңһчд 2030-ч җил күртл гермүд тосхлһн икдхмн гиҗ зуралгдҗана эн келн-улсин төсвин медлд күцәгдх керг-үүлдврмүд дунд хотл балһсна 2-ч микрорайонд газ хаһрсн 15-ч герт бәәдг улсиг гер-бүүрәр тетклһнд мөңг йилһҗ өглһнә төр хаһлгдхмн. «Цевр усн» гидг федеральн көтлврин халхар төсвин-һаруһин документац белдлһнә көдлмш төгсҗәнә, терүгәр таңһчиг уудг усар тетклһнә керг-үүлдврмүд күцәлһнд йилһх мөңгиг икдүлхин туст күүндвр давулгдҗана. Ик Буурла усна сурвлҗна бүртклһ күцәхин төлә федеральн ведомствсин элчнрин орлцатаһар көдлмшч баг бүрдәх шиидвр авгдв. Көдлмшч баг дор ормднь одҗ эн усна сурвлҗ олзллһна туст сүв-селвг орулх зөвтә. Хальмг Таңһчин Толһач Марат Шакирзяновичд ханлтан өргҗ, таңһчин делгрлтин төрмүд хаһллһнд дөң-тусан күргҗәхиг өөдәнәр үнлв. «Әрәсән правительствла хамдан таңһчин делгрлтин цуг зөрүллтсин халхар цааранднь көдлхвидн», – гиҗ Бату Сергеевич темдглв.
Барт белдснь ДООҖАН Наталья

Видео