Гемтсн улсин то баһрҗахш

16-01-2021, 13:45 | Общество, Зіњг

Хальмг Таңһчин эрүл-менд харлһна министерствин зәңглсәр, пандемий эклсн цагас авн мана таңһчд ут тоодан 16242 күн эн гемәр гемтв. Теднәснь 13489 күн эмнлһ авсна хөөн эдгв. Харм төрхд, Шин җилин байрин ашар эн гемәр гемтсн улсин то баһрх биш, нам өсәд йовна. Тегәд өцклдүр кесн шинҗллтсин ашар 93 күүнд эн хальдврта гем илдкгдв. Харм төрхд, мана таңһчд 221 күн эн гемиг диилҗ чадсн уга.
Таңһчин эмнлһсин улд үүлдҗәдг госпитальмудт 817 күн эмнлһ авчахнь медгдв. Теднәс 26 күн күндәр гемтҗәнә, 11 күн ИВЛ аппаратар кииһән авчана. Дөрвн миңһнәс үлү күн гемтә улсла хәрлцсн төләдән гертән бәәнә, эднә бәәдлиг эмчнр бүрткнә. Район болһнд гемтсн улсин тонь бас баһрҗахш: Яшкулин районд ода 54, Көтчнрә – 31, Хар Һазра – 28, Городовиковск – 25, Приютна – 29, Үстин районд – 21, Лаганьд 15 күн эмнлһнд бәәнә.
Ода күртл зәрм әмтн эн гем әәмшгтә болҗахиг төртән авлго саглуллһна керг-үүлдврмүд эс күцәҗәхнь һундлта. Кесгнь Шин җилин байрин өдрмүдт харһлдад, нәр-наадан давулҗ, элгн-садарн цуглрад бәәв. Нег үлү баһ наста улс мөн. Олн-әмтн цуглрдг һазрт эдн чирәдән хааһул өмсхш, һаран эд-бод кехш, терүнәс иштә мана таңһчд эпидемиологическ бәәдл ясрҗахш. Ода амрлһна хөөн күүкд дәкнәс сурһульдан орсмн. Тегәд бичкдүдт саглуллһна некврмүд күцәлһнә тускар, чирәдән хааһулыг эрк биш өмсх кергтәг эк-эцкнр цәәлһҗ медүлх зөвтә. Яһад гихлә өрк-бүлд чик авг-бәрцин тускар күүндәд, эк-эцкнь үрндән саглуллһна керг-үүлдврмүдин тускар келсн деерән бийснь үлгүр үзүлҗ санитарн некврмүд күцәдг болхла, тер цагт бичкдүд чигн бас саг бәәхнь лавта. Эн гем кениг чигн әрвлҗәхш, баахн наста улс чигн сәәһән хәәсн йовдлмуд бас бәәнә. Зуг цуһар саглуллһна керг-үүлдврмүд күцәдг болхла, бәәдл ясрхмн.
Удл уга таңһчд КОВИД-19 гемәс тәрлһнә дааврта кем эклхмн. Эн гемәс саглуллһна тәрлһиг авсн улс, нег үлү багшнр, эмчнр, эмин саңгин көдләчнр цугтан иргчдән эрүл-менд бәәхин тускар ухалҗ, олн дунд эн туст ирлцңгү цәәлһврин көдлмш күцәх зөвтә.

Мана зәнгч

Видео