«Бүслврин өдмг»

26-01-2021, 14:14 | Общество, Зіњг

1941-ч җилин гаха сарин 8-с авн 1944-ч җилин туула сарин 27 күртл Ленинград балһсн немшнрин бүслврт бәәсмн. Йисн зун шаху өдрин туршарт эн балһсна әмтн күчр бәәдлд бәәв, немшнр өдр-сө уга бомб хайҗ дәврдг мөн. Бәәрн әмтн өлсәд, түрү-зүдү бәәҗ, ик зовлң эдлсмн. Кесгнь өрк-бүләрн чигн даарад - харһнад әмнәсн хаһцсмн.

Төрскән харсгч Алдр дәәнә тууҗд онц орман эзлҗәх Ленинградын бүслврин тускар дорас өсч йовх үйнр медхин төлә, аврлт уга дәәнә цагт әмтн залу-зөрмгән үзүлҗ әмд үлдснә тускар тодлхин төлә җил болһн туула сарин 27-д мана орн-нутгт санлын керг-үүлдврмүд давулгдна. Теднә негнь «Бүслврин өдмг» гидг Цугәрәсән акц болна. Бүслвр эклснәс авн Ленинград балһсна әмтнд хот-хоолын карточк йилһгдсмн. Өлн үкләс гетлҗ әмд үлдхд күрх 125 грамм хар өдмг өдр болһн өгдг бәәсмн. Өдмгин нег тасрха әмтн теҗәл кеҗ ямр кевәр тесҗ чадсна тускар эндрк баһчуд медхин төлә эн керг-үүлдвр бүрдәгднә.
Хальмг Таңһчин спортын болн баһчудын политикин министерствин болн таңһчин баһчудын төвин седвәрәр Элстд болн цуг райодт Цугәрәсән керг-үүлдврин медлд бас санлын акц давулгдна. Терүнд «Диилврин волонтермуд» гидг олна бүрдәцин гешүд Ленинградын бүслврин тускар олнд келҗ, 125 грамм «бүслврин өдмг» түгәҗ өгхмн. Эн өдрмүдт таңһчин сурһуль-эрдмин бүрдәцст авртл уга дәәнә, Ленинград улсин залу-зөрмгин тускар сурһульчнрт медүлҗәх керг-үүлдврмүд давҗана.
Таңһчин баһчудын төвин ах мергҗлт Сильнин Илянан келсәр, давсн җилд мана таңһчд бас иим керг-үүлдвр давулгдсн билә. Эн җил туула сарин 27-д 13 часас авн хотл балһснд «Элст» гиичлүрин талвңд санлын керг-үүлдвр болхмн. «База тоннель» предприять эн кергин йовудт түгәҗ өгх хар өдмгин 500 тасрхаһар теткв. Роспотребнадзорин региональн заллтла үгцснә дару эн керг-үүлдвр санитарн некврлә ирлцәтәһәр давулгдхмн. Өдмгин тасрха болһн онц кевәр оралһата болхмн.
Ленинградын бүслврт ут тоодан 632 миңһн күн хорв. Эдн нурһлҗ Пискаревск санлын үкәрт оршагдсмн. 1965-ч җилин хөн сарин 8-д СССР-ин Деед Советин зәрлгәр Ленинградт герой- балһсна нер зүүлһсмн. Мана таңһчд Ленинградын бүслврин зовлң дааҗ һарсн һурвн күн бәәнә гиҗ пенсионн саңгин региональн әңгин барин цергллт зәңглв. Бичкндк цагтан күчр зовлң дааҗ һарсн улс эн өдр тер һашута цагиг дәкәд нег тодлҗ, өөрхн элгн-саднаннь санл тевчнә. Өдмгин тасрхаһар теҗәл кеҗ өлн үкләс әмд-менд һарсн улсин залу-зөрмг йовдлыг дорас өсч йовх баһ үйнр әрүн кевәр тодлҗ йовхнь эднд бахмҗ болна.
ДООҖАН Наталья

Видео