Эмнлһн туста болхин төлә

26-01-2021, 14:15 | Общество, Зіњг

Хальмг Таңһчин эрүл-менд харлһна министерствин зәңглсәр, пандемий эклсн цагас авн мана таңһчд ут тоодан 17 миңһн һар күн коронавирусн гемәр гемтв. Сүл хонгт дәкәд 71 күн эн хальдврта гемәр гемтснь медгдв. Тиигәд, ода таңһчин эмнлһсин улд үүлдҗәдг госпитальмудт 770 күн, гертән болхла 4216 күн эмнлһ авчана. Теднәснь күнд кевәр гемнҗәх 26 күүнәс 17-нь ИВЛ-аппаратд бәәнә. Һундл төрхд, сүл өдрмүдт эн гемәс көлтә сәәһән хәәсн улсин то икдәд, 240-д күрв.

Эн хальдврта гемәс цаглань эмнлһ авсн 14448 күн эдгв. Келхд, эдн эмнлһ авсна хөөн эрүл-мендән батрулҗ реабилитацин керг-үүлдврт орлцна. Таңһчин госпитальмудт эмнлһ авсна хөөн эдн КалмГУ-н оютнрин бәәрнд болн Деед Яшкулин санаторн сурһулин улд секгдсн госпитальд эрүл-мендән батрулна. Хальмгин эмчнр иим улсин эрүл-менд батруллһна төлә шишлң дамшлһ үүдәҗ һарһсн бәәнә. Одахн Деед Яшкульд цааранднь эмнлһ авчах улс ямаран занятьс кедгин тускар социальн сетьд видео барлад, эрүл-менд харлһна көдләчнрт ханлтан өргсмн. Темдглхәс, тедн дунд гемнь күнд кевәр давад реанимацд чигн бәәсн улс ханлтын үгән келсн билә. Эн гемәр гемтсн улс удан цагт бийнь тас уга болад, чинәнь алдрад, цогц-махмуднь зована. Тегәд иим реабилитацин керг-үүлдврмүд күцәгдҗәхнь эднд туста болҗахнь лавта.
Мана таңһчд хаслһна диг-даран лу сарин 14 күртл зарлгдсн бәәнә, тегәд олн-әмтн цуглрдг һазрт йовсн цагтан Роспотребнадзорин саглуллһна некврмүдиг эрк биш күцәх кергтә. Чирәдән хааһул өмсхән, һаран эд-бод кехән бичә марттн.

БАТАН Наталья

Видео