Хальдврта гемәс саглхар

26-01-2021, 14:23 | Общество, Зіњг

Пандемий эклсн цагас авн таңһчин эрүл-менд харлһна көдләчнр шин коронавирусн гемәс хөрлһнә кергт түрүн зергләнд бәәнә. Эдн гемтә улсин әм аврлһна, теднд медицинск дөң күрглһнә үнн - чик седклтәһәр көдлҗәнә. Харм төрхд, эдн дунд кесгнь эн хальдврта гемәр бас гемнтв. Тегәд чигн мана орн-нутгт эн гемәс саглулҗ тәрлһнә керг-үүлдвр эклхлә, эрүл-менд харлһна көдләчнр хамгин түрүнд терүг авв.

Эрүл-менд харлһна, сурһуль-эрдмин, социальн халхин көдләчнр тәрлһ авчана. П.Жемчуевин нертә таңһчин эмнлһнә көдләчнр бас терүнд шунмһаһар орлцҗ, эн гемәс саглх тәрлһ авчана. Ода деерән эн эмнлһнд 93 көдләч тәрлһ авлһна хойр девсңд орлцсн бәәнә.
- Би түрүн болн хойрдгч тәрлһ авв. Әрәсән эрүл-менд харлһна министерств тәрлһ авсн улс халу дөрәд, толһань өвдх чигн гиҗ саглсн билә, болв би тәрлһиг сәәнәр дааҗ чадв, эрүл-менд бәәнәв. Тәрлһ авсна хөөн би цусна шинҗллт кесн биләв, терүнә ашар нанд эн хальдврта гемәс антитела бәәхнь медгдв, – гиҗ таңһчин эмнлһнә ах эмчин дарук Орган Виктор келв.
Таңһчин эмнлһнә ах эмч Бадм-Һәрән Очрин келсәр, лу сард дәкәд 40 көдләч тәрлһ авхмн гиҗ зуралгдҗана. «Спутник V» вакцин авч ирснә дару эднд тәрлһ кегднә. Энд хамгин түрүнд хальдврта гемәс эдгәлһнә госпитальд көдлҗәх улс тәрлһ авна, цуһар эдн сән дурар болн өңгәр терүг келһүлнә. Тәрлһ авхиннь өмн цуһар цусна шинҗллт кенә, эдниг терапевт хәләнә. «Цуһар бидн эмнлһнә бүрдәцд көдлҗәх төләдән бийиннь болн талдан улсин эрүл-мендин тускар ухалҗ, ик дааврта болҗанавидн. Тегәд эн гемәс саглуллһна тәрлһиг авх кергтәг медҗәнәвидн», – гиҗ Очр Владимирович темдглв.
Мана зәңгч

Видео