Райодын толһачнр – таңһчин эмнлһнд

28-01-2021, 09:25 | Общество, Зіњг

Пандемий эклсн цагас авн мана таңһчин эмнлһсин улд госпитальмуд бүрдәгдҗ. Таңһчин эрүл-менд харлһна көдләчнр шин хальдврта гемәс хөрлһнә көдлмшт шунмһаһар орлцҗ арһ-чидлән нөөлго, гемтә улст дөңгән күргҗәнә. Урднь үзгдәд уга хальдврта гемиг күн болһн онц кевәр дааҗ һарна.

Тегәд эрүл-менд харлһна көдләчнрт болн гемтә улст эн күнд цагла олна дөң ик урмд өгнә. Темдглхәс, пандемий эклсн цагас авн олна бүрдәцс, арһлачнр, фермермүд, артистнр болн нань чигн буйнч седклтә улс госпитальмудт көдлҗәх эмчнриг болн тенд эмнлһ авчах улсиг дөңнҗ, цаһан седкләсн олн зүсн керг бүтәв. Кесгнь эмәр, саглуллһна кегдлмүдәр, хот-хоолар, махар теткв, артистнр болхла билг-эрдмән үзүлҗ эднә омг өргв.
Шидр таңһчин ар үзгт бәәдг Октябрьск, Сарпан, Баһ Дөрвдә болн Көтчнрә райодын толһачнр П.Жемчуевин нертә таңһчин эмнлһнд үүлдҗәдг 3-ч болн 3/1-ч госпитальмудт көдлҗәх эрүл-менд харлһна көдләчнрт хөөнә мах болн тутрһ авч ирв.
- Бидн эн райодын толһачнрт ик ханлтан өргҗәнәвидн. Мана һазра улс, арһлачнр, райодын муниципальн бүрдәцсин толһачнр дару-дарунь госпиталиг хот-хоолар, зер-земшәр, шикр-балтаһар болн саглуллһна кегдлмүдәр теткнә. Коронавирусн гемәс хөрлһнд көдлҗәх улсиг дөңнҗәх йовдлыг бидн өөдәнәр үнлҗ цугтаднь бат эрүл-менд дурдҗанавидн, – гиҗ эмнлһнә ах эмч Бадм-Һәрән Очр келв.
Көтчнрә района муниципальн бүрдәцин толһач Һооҗура Санлын темдглсәр, Очр Владимирович урднь удан цагт района эмнлһ һардҗ йовсмн. Эн района эмнлһнә үүлдвриг күцәмҗтәһәр бүрдәв, бидн ода чигн кергин болн иньгллтин халхар нөкцҗ үүлднәвидн, – гиҗ Санл Вадимович темдглв.
- Цуг нарт-делкәд әмтн эмнлһсиг дөңнхәр шунҗана, тер тоод бидн чигн эрүл-менд харлһна көдләчнрт эн күнд цагла чадсарн оньган тусханавидн. Таңһчин һоллгч эмнлһн кесг сарин туршарт коронавирусн гемәс хөрлһнд орлцҗана, тегәд Очир Владимирович эн үүлдвриг дигтә-даратаһар бүрдәснь темдгтә. Мана таңһчин цуг улс эмчнрт, дунд медицинск көдләчнрт болн санитармудт бас эрүл-менд дурдҗана, – гиҗ Баһ Дөрвдә района толһач Лиҗин Сарң келв.
Темдглхәс, буйнч седклтә улс таңһчин эмнлһсин көдләчнриг дөңндг деерән социальн бүрдәцст бәәдг гемтә-шалтгта улсиг болн медәтнриг оньгасн алдҗахш. Давсн җилин мөрн сарас авн цуг эн бүрдәцс шишлң диг-дараһар үүлдҗәнә, тегәд социальн көдләчнр нег-негән соляд хойр долан хонга селгәһәр көдлнә. Цаһан седклтә улс эдниг бас дөңнҗ, буйнч седклин кергүд бүрдәнә.
ДООҖАН Наталья
Райодын толһачнр – таңһчин эмнлһнд

Видео