Бәәдл ода чигн нәрн

28-01-2021, 09:27 | Общество, Зіњг

Өцклдүр Хальмг Таңһчин эрүл-менд харлһна министр Кикенә Юрий болн Роспотребнадзорин региональн заллтын һардач Санҗин Җаңһр коронавирусн гемин туст тогтсн бәәдлин болн эн хальдврта гемәс саглуллһна тәрлһ авлһна тускар келҗ өгв. Хамгин түрүн таңһчин ах санитарн эмч Санҗин Җаңһр коронавирусн гемин туст тогтсн бәәдлиг үнлҗ, тооцаһан өгв.

Тиигәд, пандемий эклсн цагас авн мана таңһчд ут тоодан коронавирусн гемәр 17194 күн гемтв. Сүл хонгт дәкәд 81 күүнд эн хальдврта гем илдкгдв. Таңһчин госпитальмудт ода 735 күн эмнлһ авчана. Күнд кевәр гемнь давҗах 26 күүнәс 16-нь ИВЛ-аппаратар кииһән авчана. Һундл төрхд, эн гемәс көлтә хорсн улсин то икдәд, 245 болв. 4185 күн гертән амбулаторн эмнлһ авчана. Мана таңһчд эпидемиологическ бәәдл тер кевәрн нәрн болҗана. Таңһчин эмнлһсин улд бүрдәгдсн госпитальмудт ода деерән бәәдг ормсин 30 шаху процентнь сул бәәнә. Бичкдүд дунд эн хальдврта гемәр гемтсн йовдл баһрҗахиг Джангар Николаевич темдглв.
Шуд залһлдана йовудт гриппәс болн коронавирусн гемәс саглуллһна тәрлһ авлһна төрт онц оньг өггдв. Тиигәд, мана таңһчд бәәдг әмтнә 60 процентнь намрин кемд гриппәс тәрлһ авсна ашт эн гемин туст эпидемиологическ бәәдл ода деерән сән гиҗ ах санитарн эмч келв. Болв авъяст тохрсар лу сард эн гемәр әмтн гемтснь икднә, тегәд эн хальдврта гемәс бас саглҗ, чик авг-бәрцәр бәәх кергтә.
Таңһчин эрүл-менд харлһна министр Кикенә Юрийин келсәр, ода мана таңһчд коронавирусн гемәс миңһ шаху күн тәрлһ авв. Эннь нурһлҗ эрүл-менд харлһна, сурһуль-эрдмин болн социальн халхин көдләчнр болна. Бәәрн улс тәрлһ авхин төлә шаңһа туслмҗин порталд бичгдҗ, бас эн кергт шунмһаһар орлцҗана. Электронн эв-арһар хойр миңһн күн бичгдсн бәәнә, эдн чеерүдән күләҗәнә. Мана таңһчд эн гемәс саглуллһна вакцинә 4 дундур миңһн доз йилһгдхмн гиҗ урднь зәңглгдсн билә, болв терүнәс даву эм йилһгдхмн гиҗ дааврта һардач темдглв. Райодын эмнлһсин төлә киитрүләчнр хулдҗ авхар зуралҗана, тегәд хол селәдт тәрлһ келһнә керг бас бүрдәгдхмн.

БАТАН Сәәхлә

Видео