Бичкдүд баһар гемтҗәнә

30-01-2021, 07:36 | Общество, Зіњг

Өцклдүр Хальмг Таңһчин эрүл-менд харлһна министр Кикенә Юрий болн таңһчин ах санитарн эмч Санҗин Җаңһр коронавирусн гемин туст тогтсн бәәдлин тускар келҗ, әмтиг соньмсулҗах төрмүдәр цәәлһвр өгв.

Хамгин түрүнд Джангар Николаевич сүл то-дигин тускар келәд, пандемий эклсн цагас авн мана таңһчд 17345 күн коронавирусн гемәр гемтсиг заав. Сүл хонгт дәкәд 75 күүнд эн гем илдкгдв. Мана таңһч урдк кевәрн 100 миңһн күүнә кемҗәнд гемтсн улсин тооһарн Әрәсәд 4-ч орм эзлҗәнә. Ода госпитальмудт 758 күн эмнлһ авчана. Энүнә хөөн 158 күн цааранднь эрүл-мендин бәәдлән батрулҗ эмчнрин хәләврт реабилитацин керг-үүлдврт орлцҗана. Гемнь күнд кевәр давҗах 25 күүнәс 13-нь ИВЛ-аппаратар кииһән авчана. Сүл цагт райодын эмнлһсин улд үүлдҗәдг госпитальмудт гемтә улсин то баһрҗахнь темдгтә. Тиигәд, ода деерән Яшкульд –41 болн Городовиковскд – 37 күн эмнлһнд бәәнә. Наадк райодын госпитальмудт хөрәд шаху күн эмнлһ авчана. Эрүл-менд харлһна министрин келсәр, зәрм госпитальмудын үүлдвриг зогсаҗ, эмнлһс урдк кевәрн әмтнд дөң күргдгиг теткх кергтә.
Роспотребнадзорин региональн заллтын һардачин темдглсәр, ода таңһчд коронавирусн гемәс саглуллһна тәрлһ келһнә керг-үүлдвриг бүрдәлһнә төр хаһлгдҗана. Ода мана орн-нутгт һурвдгч вакцин үүдәҗ һарһгдсн бәәнә, терүг лу сарин чилгчәр эс гиҗ моһа сард әмтнд кедг болхмн гиҗ зуралгдҗана. Тер цагт әмтн һурвн вакцинәс эднд зокчахинь шүүҗ авч чадхмн. Ода деерән «Спутник-V» болн «ЭпиВакКорона» олзлгдҗана.
- Өдгә цагт таңһчин сурһуль-эрдмин бүрдәцст эпидемиологическ бәәдл тогтун болҗана. Үвлин амрлһна хөөн сурһульдан һарсн кемлә дүңцүлхлә, ода гемтсн бичкдүдин то баһрв. Ода деерән сурһулин бүрдәцс алс-зәәһин кевәр үүлдхин тускар күүндвр һарчахш. Зуг нег класст сурһульчнрин 20 процентәс үлү күн гемтсн цагт тедн карантинд һарна. Болв авъяст тохрсар лу сард ОРВИ болн гриппәр гемтсн йовдлмуд икднә, тегәд саглуллһна некврмүд күцәх кергтә. Сурһулин бүрдәц болһнд өрүн болһн сурһульчнрин халу шинҗлҗ, аһариг эд-бод кедг рециркулятормуд олзлх кергтәг мартхмн биш. Кемр өрк-бүлд нег күн гемтсн болхла, тер салу хорад бәәҗ, салу ааһ-сав олзлҗ, саглуллһна эв-арһс күцәх зөвтә. Нег үлү герт медәтә улс бәәдг болхла цуһар терүнә эрүл-мендин тускар ухалх зөвтә, – гиҗ Джангар Николаевич тодлулв.

БАТАН Сәәхлә

Видео