Нөкцлтиг батрулхар

15-04-2021, 15:47 | Общество, Зіњг

Шидр Хальмг Таңһчин Толһач Хаска Бату Росфинмониторингин ЮФО-д үүлддг регионмуд хоорндк заллтын һардач Герман Шатскийлә харһв. Давсн җилд заллт болн таңһчин правительств хоорнд батлгдсн бооца күцәлһнә тускар харһлтд күүндвр һарв.
Хаска Батун темдглсәр, таңһчд экономик делгрүллһнә, цуг халхс олзта-тустаһар болн ил үүлдхин туст дигтә-дарата көдлмш күцәгдҗәнә. Тер тоод селәнә эдл-ахун халхд. Маднд экономикд йилһгдҗәх мөңгиг олзта-тустаһар олзлхиг шинҗлх даавр бәәдг федеральн структурмудла нөкцҗ үүлдхнь ик чинртә болҗана», – гиҗ Бату Сергеевич келв.
Росфинмониторинг Хальмг Таңһчд йилһгдҗәх болн энд олзлгдҗах мөңгиг тустаһар һарһлһиг шинҗллһнә керг-үүлдвр бүрдәв гиҗ Герман Шатский темдглв. Ик болн социальн чинртә шаңһа бооца күцәдг бүрдәцсин үүлдврин тускар регионмудын толһачнриг зәңглҗ, бюджетәс йилһгдҗәх мөңгиг бүртклһнә чинриг өөдлүлх күсл тәвгдҗәнә.
Хаска Бату болн Герман Шатский бюджетәс йилһгдҗәх мөңгиг чикәр олзллһна туст бүртклһнә хамцу керг-үүлдврмүд күцәлһнә болн нөкцҗ үүлдхин туст зура батллһна тускар үгцв. Харһлтын чилгчәр Хаска Бату күндтә гиичд келн-улсин төсвс болн шаңһа көтлврмүд күцәлһнә туст сүв-селвг өгснднь ханлтан өргв.
Мана зәңгч

Видео