Негдсн дем өгдг болхмн

24-11-2022, 13:12 | Общество

Шидр Әрәсән Президент Владимир Путин бичкдүдт болн саата күүкд улст негдсн демин мөңгнә туск заканд һаран тәвв. Терүнәс иштә 2023-ч җилин туула сарин 1-әс авн Әрәсән Федерацд саата күүкд улст болн арвн долан нас күртл арвтнрт негдсн демин мөңг өгдг болхмн.
Эн өдрмүдт Әрәсән күч-көлснә министерств баһ тетквртә өрк-бүлмүдт асргдҗадг бичкдүдт негдсн демин мөңг өглһнә зокалын туск олн әмтнә ухан-тоолвр медҗ авхин төлә олна оньгт терүг тусхав. Әрәсән Президентин даалһврар бичкдүдиг асрҗадг өрк-бүлмүдиг дөңнлһнә тогтаврин төсв белдгдв. Негдсн демин мөңгиг сарин теҗәлин региональн кемҗәнәс баһ олз-орута үрнь һархиг күләҗәх саата күүкд улс болн 17 нас күрәд уга бичкдүдиг асрҗадг өрк-бүлмүд авдг болхмн. Демин мөңгиг 3-ас авн 7 болн 8-әс авн 17 нас күртл бичкдүдт өгдг демин мөңг авдг өрк-бүлмүдин туст бәәдг некврлә ирлцәтәһәр өгхмн.
Хальмг Таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан келсәр, түрүн кесн тааврас иштә 2023-ч җилд негдсн демин мөңгиг 24586 күн авхмн, эн кергт ут тоодан 1960 сай арслң керглгдх. 2025-ч җил күртл эн демин мөңг авдг улсин то 30344 күртл өсх, ут тоодан 4862 сай арслң һарһгдх гиҗ күләгдҗәнә.

Видео