Әрәсән Залврин Ахлачин дарук һәәхүл хәләв

02-12-2023, 09:00 | Общество

Одахн Хальмг Таңһчин Толһач Хаска Бату Москвад ВДНХ-д давҗадг «Әрәсә» нарт-делкән һәәхүлд одв. Мел тер өдрт Әрәсән Залврин Ахлачин дарук Дмитрий Чернышенко тиигәрән бас ирсн билә.

– Дмитрий Николаевич мана таңһчин һәәхүлд өөрдәд ирхләнь терүнд цуг тоотын тускар эврән цәәлһҗ өгләв. Шатр, VR, харвлһн болн нань чигн тоот һәәхүлин гиичнриг соньмсулна. Күндтә гиичд кикбоксингин ирлцәтәһәр углҗ тәвгдсн кергсл таасгдв, гиҗ Хаска Бату темдглв.
Эннь иргчдән таңһчд тосхгдх фиджитал-төвин студь болҗана. Тенд спорт болн киберспорт негдҗ, дорас өсч йовх баһчудыг спортд орлцулхин төлә тосхгдхмн.
Тер мет Дмитрий Николаевич IT-халхар мана күцәмҗсин тоотла бас таньлдв. Тернь Әрәсән келн-улсин һучн келәр һарсн «Сокровище нации» наадн, тод бичгәр дасхҗ бичдг шишлң электрон шрифт болн нань чигн тоот мөн. Келхәс, Д.Чернышенкон күүкнәннь неринь тод бичгәр бичҗ энүнд белглвидн.
Терүнәс нань баһ наста шатрин нарт-делкән чемпион Шогҗин Романа күцәмҗс бас темдглгдв. Дәкәд Бату Сергеевичин үр-иньг, Европин болн нарт-делкән чемпион Владимир Минеев ирҗ, мана таңһчин һәәхүлиг бас үнлв.
Үкр сарин 29-д «Әрәсә» һәәхүлин йовудт Марий Эл Республикин болн Ульяновск мүҗин өдрмүд болв. Хойр региона толһачнр Юрий Зайцевиг болн Алексей Русскихиг энүнлә йөрәҗ, Бату Сергеевич бар сарин 12-т Хальмг Таңһчин өдрт нерәдсн байрт ирхиг теднд болн олн-әмтнд үрвр кев.

ОЛЬДАН Цаһан