Төрскн сурһульдан одв

02-12-2023, 09:10 | Общество

Хальмг Таңһчин Толһач Хаска Бату Очра ЛиҗҺәрән нертә 3-ч тойгта Лаганя дунд сурһульд одв. Эн җил тенд бат ясвр күцәгдв. Бату Сергеевич багшнрла болн ах классмудын сурһульчнрла харһҗ күүндв.

– Төрскн Лаганьдан би хәәртәв. Яһҗ эн балһсн шинәс босхгдснь ах үйин лаганяхн медх, урднь кедү бүрдәцс бәәсинь, тер мет көдлмшч ормс цугтаднь күрдг билә. Эн туст дунд сурһулин чинрнь бас бәәнә, гиҗ Бату Сергеевич темдглв.
Эңкр багшнртан ханлтан өргҗ, Хаска Бату багшин болн сурһмҗлгчин җиллә теднән дәкнәс йөрәв. Өдгә цагт мана орн-нутгт сурһуль-эрдмин бүрдәцс олар тосхгдҗана. Әрәсән Президент Владимир Путин болн орн-нутгин Залвр мана таңһчиг даңгин дөңнҗәхиг таңһчин Толһач бас темдглв. Дорас өсч йовх бичкдүд сән кец-таалта сурһульмудт сурх зөвтә.
Сүл цагт таңһчин багшнрин төлә дөңнлһнә эв-арһс йилһгдҗәнә. Үлгүрлхд, 35 нас күрәд уга багшнр 5 миңһн арслң немр мөңг авна. Тер мет бичкдүдин садмудт көдлдг сурһмҗлачнрт болн немр сурһулин багшнрт 6 миңһн арслң немр дөң өггднә. Классин һардачнриг урмдулхин төлә бас немр мөңгн йилһгднә.
Ик чинртә багшин эрдмиг өөдлүлхин төлә олн зүсн дөңнлһнә эв-арһс цааранднь йилһгдхмн, гиҗ Хаска Бату иткүлв.

ОЛЬДАН Цаһан

Видео