Көдлмшәр тетклһнд туслна

02-12-2023, 09:30 | Общество

Көдлмш уга улст дөң болхин төлә мана орннутгт, тер тоод таңһчд «Демографь» гидг келн-улсин төсвин «Көдлмш олҗ авхд тусан күрглһн» гидг региональн төсвин медлд көдлмшәр тетклһнә, күч-көлснә хаалһан эклҗәдг баһчудыг дөңнлһнә, онц зөв эдлдг әмтнд немр эрдм дасч авлһна болн нань чигн керг-үүлдврмүд күцәгднә. Шидр Хальмг Таңһчин социальн делгрлтин, күч-көлснә болн көдлмшәр тетклһнә министрин дарук Ольга Маминова эн төсвин медлд күцәгдҗәдг керг-үүлдврмүдин аш диглҗ, көдлмш уга улсин то баһруллһна төлә ямр немр төрмүд хаһлгдҗахин тускар тооцаһан өгв.

Тиигәд, Ольга Борисовнан темдглсәр, нидн әмтиг көдлмшәр тетклһнә немр керг-үүлдврмүд күцәлһнд Әрәсән залврин саңгас мөңгн йилһгдсн болхла, эн җил «Көдлмш олҗ авхд тусан күрглһн» гидг региональн төсвин медлд эн кергт мөңгн йилһгдсн билә. Цуг эн керг-үүлдврмүдиг таңһчин әмтиг көдлмшәр тетклһнә цергллтс күцәв, эдн эн җилин эклцәс авн ут тоодан таңһчин бүрдәцслә 51 бооца батлв. Эн төсвин медлд 217 иргн көдлмшәр теткгдв, теднәснь 122 күн тосхлтын, көлгн-күчнә, хулд-гүүлгәнә халхд цаг зуур көдлмшәр теткгдв. Тер мет 95 күн олна көдлмшт орулгдв, эдн селәнә эдл-ахуд, хулд-гүүлгәнд болн олн-әмтн хот уудг бүрдәцст көдлв. Сүл хойр җилин эргцд көдлмшәр тетклһнә немр керг-үүлдврмүдин ашт 600 күн көдлмш олҗ авв. Темдглхәс, әмтиг көдлмшәр тетклһнә цергллтин тоод бәәсн иргнмүдиг олна болн цаг зуур күцәх көдлмшт авсн бүрдәцст җалвин һару даңцалһнд субсидь өггднә. Тер мет иим бүрдәцст нег көдлмшч орм бүрдәлһнә төлә материальн-техническ теткврт мөңгн бас йилһгднә.
(полную версию статьи можно посмотреть в бумажной версии выпуска № 131 (18970) 2 декабря 2023 года, СУББОТА)

ДАВАН Наталья
ЗУРГТ: шин эрдм дассн улс тааста эрдмәрн көдлмш олҗ авна

Видео