Көгҗмәр дүүрсн хойр асхн

02-12-2023, 10:10 | Общество

Манҗин Аркадин нертә Хальмг Таңһчин филармонь концертн шин селгәһән үкр сарин 24-д секв. Эн өдр филармоня залд «Зүркни тодлвр» гидг концерт болв. Хальмг Таңһчин симфоническ оркестр хальмгудыг Сиврүр тууврт йовулсна 80 җилин өөнд эн концертән нерәдв. Хар гөрәр цааҗла харһсн әмтн тууҗан, сойлан, заң-авъясан хадһлсн ах үйин әмтнә санлд көгҗмән хальмг артистнр нерәдв.

«ЗҮРКНИ ТОДЛВР»

Удан цагт татгдсн ясврас көлтә олн соңсачнр эн залд цуглрлго бәәсмн. Ода әмтн ик байртаһар иигәрән ирҗ, көгҗмиг оньган өгч соңсв. Сиврин тууврт бәәсн цагиг тиигхд күүкд-көвүд бәәсн әмтн ик зуудан мартад уга. Төрскн һазрурн әмтн хәрҗ ирснә хөөн һарсн баһчуд тер цагиг зуг эк-эцкин тодлврар меднә. Һашута үүдәврмүдәс чигн баһчуд тер тууҗиг медҗ авна. Күнд шүүвр болсн тер цагиг тодлҗ Петр Чонкушовин «Реквием-воспоминание» гидг үүдәвр бичсмн. Эн асхн әмтн терүг седклин ик үүмәтәһәр соңсв. Симфоническ оркестр, А. Цебековин нертә хор, Хальмг Таңһчин ачта артистнр Инесса Месхишвили болн Гилән Орлова эн үүдәвриг олнд көгҗмин күчинь үзүлҗ, әмтнә седклинь уйдулҗ, әвртә сәәнәр соңсхв.
(полную версию статьи можно посмотреть в бумажной версии выпуска № 131 (18970) 2 декабря 2023 года, СУББОТА)

ХӨӨЧИН Галина

Видео